Toqaev: Memlekettik kúzet qyzmeti - tótenshe mańyzdy uıym
Qazaqstan Prezıdenti jeke quramǵa Memlekettik kúzet qyzmetiniń jańadan taǵaıyndalǵan bastyǵy Ánýar Sadyqulovty tanystyrdy.
Qasym-Jomart Toqaev Qazaqstannyń memlekettik kúzet júıesin damytýdyń negizgi baǵyttary týraly Kúzet qyzmeti basshysynyń baıandamasyn tyńdady.
«Memlekettik kúzet qyzmeti - tótenshe mańyzdy uıym. Sizder qyzmet atqarý barysynda osyny qaperde ustańyzdar. Memlekettik kúzet qyzmetine aıryqsha mindetter júkteledi. Sondyqtan, memlekettik kúzet máselesi árqashan basty nazarda bolady. Tapsyrylǵan iske barynsha adaldyq tanytyp, joǵary kásibı daıyndyqtaryńyzdy kórsetetinderińizge senimdimin», - dedi Memleket basshysy.
Qazaqstan Prezıdenti ishki jáne syrtqy qaýip-qaterdiń qubylmaly jaǵdaıynda kúzet qyzmetkerleriniń kásibıligine qoıylatyn talap óte joǵary bolatynyn atap ótip, qyzmetke kásibı, ıdeologııalyq jáne zııatkerlik turǵydan daıyn jas jigitter iriktep alynatynyn aıtty.
«Memlekettik kúzet qyzmetiniń ofıtserlerinde kelissózder júrgizýge qajetti dıplomatııalyq daǵdylarǵa sáıkes keletin áskerı biliktilik, qyraǵylyq, aqparatty qoryta bilý sııaqty sapalyq qasıetter bolýy tıis. Sonymen qatar, ishki jáne syrtqy saıasatty túsinetin jáne biletin saıası bilimi jetik bolýy qajet», - dedi Memleket basshysy.
Qasym-Jomart Toqaev shuǵyl áreket etý shtabynyń jumysymen tanysyp, Memlekettik kúzet qyzmetiniń jumys kabınetterin aralap kórdi. Sondaı-aq, Kúzet qyzmetiniń jumysyn odan ári jetildirý jóninde birqatar tapsyrma berdi.