Toqaev Qazaqstan-Reseı áriptestigi qaı baǵyttarda tereń damıtynyn atady

MÁSKEÝ. QazAqparat – Qazaqstan-Reseı áriptestigi saıası, ekonomıkalyq, ınvestıtsııalyq jáne mádenı-gýmanıtarlyq baılanysty tereńdetýge baǵyttalady. QR Prezıdenti Qasym-Jomart Toqaev reseılik áriptesi Vladımır Pýtınmen ótken kelissózderden keıingi birlesken málimdemesinde osylaı dep málim etti, dep habarlaıdy QazAqparat tilshisi.

«Jańa aıtqanymdaı, kelissózder memleketterimiz arasyndaǵy áriptestiktiń barlyq qyrlaryn qozǵady. Baılanys salasy bolsyn, ekonomıkalyq salada da, ınvestıtsııa salasynda da jáne árıne negizgi halyqaralyq problemalarǵa degen kózqarastarymyz talqylandy. Qazaqstan-Reseı kún tártibindegi negizgi taqyryptardy ashyq ári ózara senim turǵysynan talqyladyq.

Elderimizdiń arasyndaǵy jan-jaqty baılanystardyń tabysty damyp jatqanyna kóńilimiz tolatynyn atap óttik. Ózara tıimdi áriptestiktiń orasan áleýetin eskere otyryp, saıası, ekonomıkalyq, ınvestıtsııalyq jáne mádenı-gýmanıtarlyq baılanysty tereńdetýge eki jaq ta talpynatynyn rastadyq», - dedi Qasym-Jomart Toqaev.

Aıta keteıik, Reseı Federatsııasynyń astanasynda QR Prezıdenti Qasym-Jomart Toqaev pen RF Prezıdenti Vladımır Pýtın kelissóz júrgizdi.

Memleket basshysynyń Reseıge jumys sapary aıasynda birqatar qujatqa qol qoıyldy.