Toqaev: Qazaq jáne mońǵol halyqtary – Uly dala órkenıetiniń muragerleri
Qasym-Jomart Toqaev pen Ýhnaagıın Hýrelsýh eki el delegatsııa músheleriniń qatysýymen keńeıtilgen quramda kelissóz ótkizdi.
Qazaqstan Prezıdenti shaǵyn quramdaǵy kezdesýdiń qorytyndysyna joǵary baǵa berip, Mońǵolııamen memleketaralyq qarym-qatynasty odan ári damytýdyń basym baǵyttaryn aıqyndady.
– Qazaq jáne mońǵol halyqtary – Uly dala órkenıetiniń muragerleri. Yntymaqtastyqty jańa strategııalyq deńgeıge kóterý eki eldiń múddesine saı keledi. Biz mońǵol halqyna úlken qurmetpen qaraımyz jáne Mońǵolııanyń jetistigine árdaıym qýanamyz. Qazirgi ýaqytta Sizdiń bastamańyzben aýqymdy saıası-ekonomıkalyq jáne áleýmettik reformalar qolǵa alyndy. «Vision-2050», «Azyq-túlikpen qamtamasyz etý jáne onyń qaýipsizdigi», «Salaýatty mońǵol ulty» sııaqty mańyzdy memlekettik baǵdarlamalar júzege asyrylyp jatyr, – dedi Memleket basshysy.
Qasym-Jomart Toqaev eki eldiń arasynda tyǵyz parlamentaralyq jáne úkimetaralyq baılanystar qalyptasqanyn eske salyp, yntymaqtastyqty nyǵaıtýǵa aıtarlyqtaı múmkindik bar ekenine nazar aýdardy
– Saýda-ekonomıka, aýyl sharýashylyǵy, kólik-logıstıka, taý-ken ındýstrııasy, ónerkásip, ınvestıtsııa, jańa tehnologııalar, ǵaryshty ıgerý salalarynda yqpaldastyqty jandandyrý qajet. Búgin qol qoıylatyn qujattar saıası jáne ekonomıkalyq alys-beristi damytýǵa tyń serpin beredi dep senemin, – dedi Prezıdent.
Qasym-Jomart Toqaev qol jetkizilgen ýaǵdalastyqtardy eki el úkimetteri ýaqtyly jáne sapaly júzege asyrýy qajet dep sanaıdy.
Budan bólek, Memleket basshysy mádenı-gýmanıtarlyq baılanysty nyǵaıtýdyń mán-mańyzyna toqtalyp, Astanada ótken Dúnıejúzilik kóshpendiler oıyndaryna qatysqany úshin mońǵol sportshylaryna alǵys aıtty.
Qasym-Jomart Toqaev Qazaqstan mońǵol stýdentteri úshin kvota sanyn ulǵaıtýǵa daıyn ekenin málimdedi. Sondaı-aq eki el ǵalymdaryn ortaq baı tarıhı muramyzdy birlese zertteýge shaqyrdy.
Budan bólek, Prezıdent ekologııalyq, tarıhı, etnografııalyq jáne ekonomıkalyq týrızm baǵyttarynda birlese jumys isteýge mol múmkindik bar ekenin atap ótti.
– Qazaqstandyq týroperatorlar mońǵol týrısterine Qoja Ahmet ıAsaýı kesenesi ornalasqan ejelgi Túrkistan qalasyn tanystyra alady. Shyńǵys hannyń úlken uly Joshy hannyń mazary turǵan Ulytaý oblysyn jáne basqa da týrıstik oryndardy kórsetýge bolady. Sondaı-aq biz Mońǵolııamen Altaı týrızm klasterin damytýǵa jáne ortaq týrıstik baǵyttardy qalyptastyrýǵa múddelimiz, – dedi Memleket basshysy.
Qasym-Jomart Toqaev Mońǵolııa Prezıdentin kelesi jyly Qazaqstanǵa memlekettik saparmen kelýge shaqyrdy.
Óz kezeginde Ýhnaagıın Hýrelsýh Mońǵolııanyń Qazaqstanmen ekijaqty baılanystardyń barlyq baǵytyn nyǵaıtýǵa beıil ekenin rastady. Ol búgin qol jetkizilgen ýaǵdalastyqtar eki el arasyndaǵy qarym-qatynastyń jańa paraǵyn ashatynyna senim bildirdi.
Ýhnaagıın Hýrelsýh Qazaqstandy Mońǵolııanyń mańyzdy seriktesi, sondaı-aq Shyǵys pen Batystyń arasyndaǵy altyn kópir ekenin atap ótti. Onyń sózinshe, Ulan-Batyr Qazaqstannyń ekonomıkalyq damý tájirıbesine den qoıyp otyr. Sonymen qatar saýda, kólik-logıstıka, aýyl sharýashylyǵy, ǵaryshty zertteý salalaryndaǵy ekijaqty jobalardy tıimdi júzege asyrýǵa aıryqsha mán beredi. Atap aıtqanda, Ýhnaagıın Hýrelsýh Qasym-Jomart Toqaevtyń eki el arasyndaǵy taýar aınalymyn 500 mıllıon dollarǵa deıin jetkizý týraly usynysyn qoldady.
Kelissózder aıaqtalǵannan keıin memleketter basshylary Strategııalyq seriktestik ornatý týraly birlesken deklaratsııaǵa qol qoıdy. Sodan keıin qol qoıylǵan qujattardy almasý rásimi ótti.
Eske salsaq, 28-29 qazan kúnderi Prezıdent Qasym-Jomart Toqaev Mońǵolııaǵa memlekettik saparmen baratynyn habarladyq. Qazaqstan men Mońǵolııa prezıdentteri shaǵyn quramda kelissóz júrgizdi. Sondaı-aq Mońǵolııanyń Uly Memlekettik Hýralynyń Tóraǵasy Dashzegvıın Amarbaıasgalanmen jáne Premer-mınıstr Lývsannamsraın Oıýýn-Erdenemen kezdesedi. Myńdaǵan jyldarǵa sozylǵan tarıhı baılanysy bar eki halyqtyń qazir túrli saladaǵy qarym-qatynasy jaqsy deńgeıde. Eki el basshysynyń kezekti kezdesýinde saıası jáne ekonomıkalyq baılanystardy nyǵaıtý jaıy talqylanyp, birqatar kelissóz ótýi múmkin ekeni aıtyldy.
Sonymen qatar Qazaqstan men Mońǵolııaǵa arasyndaǵy uzaq jylǵy baılanys týraly Kazinform tilshisiniń materıalynan oqýǵa bolady.