Toqaev Qańtar oqıǵasy jaıly: Beıbit sherý men qaraqshylardyń qandy qylmysynyń arasyn ajyrata bilý kerek
«Qasiretti Qańtar elimiz úshin zor synaq boldy. Qasaqana áreket etken qaraqshylar toby memlekettigimizdiń tuǵyryn shaıqaltýǵa tyrysty, eldegi turaqtylyqtyń tamyryna balta shapqysy keldi. Biz bul jerde bir máseleniń basyn ashyp alýymyz kerek. Beıbit sherýlerdiń sebebi – bir bólek. Al, memlekettik tóńkeris jasaǵysy kelgenderdiń maqsaty – múlde basqa. Qańtar oqıǵasynyń astaryna úńilsek, onyń sebepteri aıqyn kórinedi. Elimizde uzaq ýaqyt áleýmettik ádildik nazardan tys qaldy. Memleket pen qoǵamnyń arasy alshaqtap ketti. Jyldar boıy sheshilmegen áleýmettik-ekonomıkalyq máselelerden jurt ábden qajydy. Bul – túsinikti jaıt. Alaıda, qylmyskerlerdiń kózdegeni basqa edi. Olar beıbit sherýdi jappaı tártipsizdikke aınaldyrǵysy keldi. Aldyn-ala ázirlegen arandatýshylar, buzaqylar, tipti qaraqshylardy paıdalandy. Sonyń kesirinen Almatydaǵy jaǵdaı kúrt nasharlady, tipti, baqylaýdan shyqty. Qylmyskerler ákimshilik ǵımarattardy basyp aldy. Kóshelerdi jaýyp, jolynda kezdeskenniń bárin qıratty, tonady. Qysqasy, oılaryna ne kelse, sony istedi. Biraq, qandaı jaǵdaı bolsyn, azamattarymyz, eń bastysy, Almatynyń asqaq rýhyn qulatqan joq. Qala turǵyndary judyryqtaı jumyldy, súıikti qalasyn qorǵap qalý úshin birikti. Árıne, sodyrlardyń mundaıdy kútpegeni aıdan anyq», - dedi Memleket basshysy.
Sonymen qatar Prezıdent Almatyny qıratyp jatqany janyna batqanyn aıtty.
«Elimizdiń altyn besigi – Almatyny qıratyp jatqany osy qalanyń perzenti retinde meniń de janyma batty. Degenmen, dál sol sátte abdyrap, ýaqyt uttyrýǵa esh qaqymyz bolǵan joq. Onda ábden dandaısyp ketken qaraqshylar qalamyzdy kúl-talqan eter edi.
El taǵdyry synǵa túsken jaýapty sátte halqymyz myzǵymas birligi men qaıtpas qaısarlyǵyn tanytty. Memlekettigimizdi saqtap qalý úshin biz qandaı táýekelge de baratynymyzdy aıqyn kórsettik. Sol qıyn kúnderde búkil Qazaqstan halqy almatylyqtardyń tileýin tiledi. Ókinishke qaraı, qazir keıbireýler qylmystyq áreketti halyq kóterilisi dep aqtaýǵa tyrysyp júr.
Taǵy da aıtamyn: halyqtyń beıbit sherýi men qaraqshylar jasaǵan qandy qylmystyń arasyn ajyrata bilý kerek. Biz jedel jáne batyl áreket jasaǵannyń arqasynda el ishinde dereý tártip ornattyq. Qabyldaǵan sheshimderimiz jáne is-áreketimiz búkil dúnıe júzinde túsinistikpen moıyndaldy, tipti, qoldaý tapty», - dep tolyqtyrdy Prezıdent.
Sonymen qatar Memleket basshysy qasiretti kúnder alystaǵan saıyn birtindep kómeski tarta beretinin jetkizdi.
«Ýaqyt – emshi» deıdi halqymyz. Qasiretti kúnder alystaǵan saıyn birtindep kómeski tarta beretini anyq. Qarýly toptardyń qalaı oıran salǵany da esten shyǵýy múmkin. Biraq, biz el ishine jik salǵysy keletin arandatýshylardyń jeteginde ketpeýimiz kerek. Kóshege shyǵyp, buzaqylyq jasaǵan adamdardy dáriptep, qoldan qaharman jasaýǵa bolmaıdy. Qastańdyq uıymdastyrǵan qaraqshylardyń qylmysyn aqtaýǵa jol berilmeıdi. Olardyń bári laıyqty jazasyn alady. Biraq, qylmyskerlerdiń qolshoqpary bolǵan, arandap qalǵan jandar da bar. Men aýyr qylmys jasamaǵan osyndaı azamattarǵa keshirimmen qaraǵan jón dep sheshtim. Osyǵan oraı, Raqymshylyq týraly zań qabyldandy. Bul – adamgershilik turǵydan durys qadam. Óıtkeni, keshirim – izgiliktiń belgisi. Qajetti zańdyq rásimder keıin raqymshylyq jasalǵan adamdar bosatylyp, otbasyna oralady. Budan bylaı mundaı qasiret qaıtalanbaıdy dep senemin. Sol úshin biz qoldan kelgenniń bárin jasaımyz. Qaıǵyly kúnderde qaza bolǵan jandardyń jaqyndaryna taǵy da kóńil aıtamyn. Syn saǵatta antqa adal bolǵan quqyq qorǵaý jáne kúshtik qurylymdardyń qyzmetkerlerin erekshe atap ótkim keledi. Qoǵamdyq tártipti qalpyna keltirýge qala turǵyndary da atsalysty. Osyndaı janashyr azamattardyń bárine rızashylyǵymdy bildiremin. «Qańtar qasireti» bizge synaq qana emes, úlken sabaq boldy. Tynyshtyq pen turaqtylyqtyń qadirin jurtymyz jete túsindi. Al, qoǵamǵa iritki salýdy kózdegen qaraqshylardyń, lańkesterdiń maqsaty oryndalǵan joq. Kerisinshe, halqymyzdyń birligi nyǵaıa tústi. Uıysyp, jan-jaqty jańǵyrý jolyna qadam basty», - dedi kezdesýde sóılegen sózinde.