Toqaev qalalarda kólik qozǵalysyn basqarýdyń biryńǵaı ortalyǵyn qurýdy tapsyrdy

NUR-SULTAN. QazAqparat – Elimizdiń óńirlerinde kólik qozǵalysyn basqarýdyń biryńǵaı ortalyqtary qurylady. Mundaı tapsyrmany búgin Atyraý oblysynyń áleýmettik-ekonomıkalyq damý máseleleri jónindegi keńeste Memleket basshysy Qasym-Jomart Toqaev berdi, dep habarlaıdy QazAqparat tilshisi.

«Qalalar ishindegi avtomobıl aǵyndaryn saýatty retke keltirý - jeke másele. Osyǵan oraı Úkimet pen ákimderge qaýyrt saǵat kezinde jáne demalys kúnderi avtobýstarǵa arnalǵan arnaýly jolaq paıdalaný máselesin sheshýdi tapsyramyn. Mundaı tájirıbe Máskeý, Ystanbul jáne Parıj qalalarynda taralǵan», - dedi Qasym-JomartToqaev.

Memleket basshysy qalalarda kólik qozǵalysyn basqarýdyń biryńǵaı ortalyǵyn qurý qajettigine de toqtaldy.

«Ortalyq mindetine osy saladaǵy ókiletti organdardyń jumysyn úılestirý, sonymen qatar azamattardyń shaǵymdary men usynystaryn qaraý kiredi. Aıtalyq, jol belgileriniń joqtyǵy, jumys istemeı turǵan baǵdarsham syndy máselelerge qatysty. Úkimet óńir ákimderimen birlesip, óńirlerde mundaı ortalyqtar qurý boıynsha is-sharalar qabyldaýdy tapsyramyn», - dedi QR Prezıdenti.