Toqaev elordanyń barlyq aýdanynda ınjenerlik-kommýnıkatsııalyq ınfraqurylymdy damytýdy tapsyrdy

NUR-SULTAN. QazAqparat – Nur-Sultan tórt qubylasy saı qala qaǵıdaty boıynsha damýy tıis. Bul týraly Nur-Sultan qalasynyń ákimdiginde ótken elordany odan ary damytý máseleleri jónindegi májiliste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Elorda ómir súrýge barynsha qolaıly qala bolýy kerek. Nur-Sultan tórt qubylasy saı qala qaǵıdaty boıynsha damýy tıis. Qala ulǵaıǵan saıyn turǵyndardyń turmys sapasyndaǵy alshaqtyq ta artady. Tipti, joly jáne kommýnıkatsııasy joq, abattandyrylmaǵan jer telimderi ortalyq kóshelerge irgeles ornalasqan. Mıchýrıno, Internatsıonalnyı, Kúıgenjar turǵyn alaptarynda sýmen qamtamasyz etý, káriz jelileri áli kúnge deıin ortalyq júıege qosylmaǵan. Buǵan jergilikti turǵyndar narazylyq bildirýde», - dedi Memleket basshysy.

QR Prezıdentiniń atap ótýinshe, qala shetindegi joldardyń 36 paıyzy nashar, asfalt tóselmegen. Sondyqtan kúrdeli jóndeý jumystaryn júrgizý qajet. Kóshelerdiń 20 paıyzdan astamynda jaryq joq. Mundaı keleńsizdik qylmystyń artýyna ákeledi.

«Úkimet pen ákimdikke qalanyń barlyq aýdandarynda ınjenerlik-kommýnıkatsııalyq ınfraqurylymdy damytý úshin tıisti sharalar qabyldaýdy tapsyramyn», - dedi Q.Toqaev.