Toqaev EKSPO aýmaǵy týraly: qańyrap bos jatyr
«Astana turmysqa jaıly shahar bolýy kerek. Eń aldymen, qalany damytý tujyrymdamasyn qaıta qaraǵan jón. Qazir Astanada saıabaqtar jetispeıdi. Turǵyndar serýenge shyǵatyn, demalatyn oryndar az.
Biraq qala ákimdigi muny eskermeı, qurylysqa ruqsat beredi. Bos turǵan jerge birden turǵyn úı salynady. Saıabaqtardy, jaıaý adamǵa arnalǵan kóshelerdi kóbeıtý qajet. Qalany josparlaǵan kezde munyń bárin aldyn ala oılastyrý kerek.
Qazir Esildiń jaǵasyna durys kóńil bólinbeı otyr. Mysaly, kórshi eldegi Qazan qalasynyń tájirıbesin zerttep kórýge bolady. Bul qalanyń kósheleri, saıabaqtary jáne jaǵalaý alańdary óte ádemi jáne tartymdy. Bizdiń maqsatymyz – Elordamyzdy jyldyń kez kelgen mezgilinde halqymyzǵa jáne shetel adamdaryna barynsha qolaıly etý, Astananyń kelbetin meılinshe jaqsartý», - dedi Prezıdent.
Sondaı-aq Memleket basshysy qańyrap bos jatqan EKSPO aýmaǵyn jurt jappaı demalatyn orynǵa aınaldyrýdy tapsyrdy.
«Ózenge jaıaý adam júretin kópirler salý kerek. Mundaı ótkel, ásirese, qazir salynyp jatqan Táýelsizdik dańǵylyndaǵy kópirdiń mańaıyna qajet. Kólik júrýge bolmaıtyn kósheler jóninde talaı ret aıtyldy. Biraq qalada ondaı bir de bir kóshe salynǵan joq.
Jalpy, álemdik tájirıbede dál osyndaı kósheler kóptep salynady. Bul máseleni muqııat oılastyrý kerek. Bilikti mamandardy tartyp, ońtaıly sheshim qabyldaýǵa bolady. Mysaly, bizde EKSPO aýmaǵy bar. Bir qaraǵanda, óte ádemi jer. Biraq qańyrap bos jatyr.
Shyn máninde, oǵan jan bitirip, jurt jappaı demalatyn orynǵa aınaldyrýǵa bolady. Qoǵamdyq keńistikti damytýdyń biryńǵaı tujyrymdamasyn qabyldaǵan jón. Nysandardy jobalaý jáne salý kezinde osy tujyrymdamaǵa súıený qajettigi zańdy túrde bekitilýge tıis», - dedi Q.Toqaev.