Toqaev ekonomıka aldynda turǵan jańa syn-tegeýirinder týraly aıtty

NUR-SULTAN. QazAqparat – Eksport pen ishki naryq Qazaqstanǵa jańa syn-tegeýirinmen kúreske kómektesýi tıis. Bul týraly búgin QR Prezıdentiniń «Altyn sapa» syılyǵyn tapsyrý rásiminde Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Biz ónerkásiptiń, sonymen qatar tolyqtaı alǵanda el ekonomıkasynyń aldynda turǵan jańa syn-tegeýirinderdi de eskerýge tıispiz. Bul - saýda soǵystary, iri ekonomıkalyq derjavalar arasyndaǵy sanktsııalyq shekteýler. Dúnıejúzilik saýda prıntsıpterine nuqsan keltire otyryp, saýda rejimderin shekteý jalǵasýda. Protektsıonıstik saıasatta kúsheıip keledi», - dedi Memleket basshysy.

Osy oraıda, Qasym-Jomart Toqaev elimizdiń ekonomıkasyna kómek kórsetý úshin eksport pen ishki saýdany qarqyndy damytý qajettigin basa aıtty.

«Mundaı jaǵdaıda Qazaqstannyń ekonomıkalyq áleýetin júzege asyrý úshin ulttyq bıznestiń halyqaralyq básekege qabilettiligin damytý basty másele bolmaq. Oǵan eń aldymen Úkimet kómektesýi tıis. Indýstrııalandyrý ortalyq elementi eksportty odan ári yntalandyrý men ishki naryqty damytýǵa negiz bolýy qajet», - dedi Qazaqstan Prezıdenti.