Toqaev egemendigimizdi kózdiń qarashyǵyndaı saqtaýǵa qaýqarly tulǵa - Ádil Ahmetov

NUR-SULTAN. QazAqparat - Qasym-Jomart Kemelulynyń elimizdiń ishki ári syrtqy saıasatyna sińirgen súbeli eńbegin álem qaýymdastyq jaqsy biledi. Bul týraly «Nur Otan» partııasynyń búgingi sezinde belgili memleket jáne qoǵam qaıratkeri Ádil Ahmetov málim etti, dep habarlaıdy QazAqparat tilshisi.

«Qurmetti Elbasy, ótken aıda jarııalaǵan tarıhı úndeýińizde Qasym-Jomart Kemeluly Toqaevty bılik tizginin ustaýǵa eń laıyqty tulǵa degen edińiz. Endi mine, búgingi sezde de sol pikirińizdi nyqtaı túsip, aldymyzda kele jatqan prezıdenttik saılaýǵa «Nur Otan» partııasynyń atynan usynylatyn biregeı kandıdattyń sol tulǵa ekenin túbegeıli aıshyqtap, halyqtyń kókeıine qonatyn ustanym kórsettińiz. Bul qadamyńyzdy sezd delegattary ǵana emes, halqymyz da, BUU sekildi halyqaralyq uıymdar da qoldaıtyny kúmánsiz. Óıtkeni Qasym-Jomart Kemelulynyń ózińizben shırek ǵasyr úzeńgiles bola júrip, elimizdiń ishki ári syrtqy saıasatyna sińirgen súbeli eńbegi men dıplomatııalyq arenadaǵy salmaǵyn álem qaýymdastyǵy da óte jaqsy biledi», - dedi Ádil Ahmetov Tuńǵysh Prezıdent Nursultan Nazarbaevqa qarata aıtqan sózinde.

Osy oraıda ol Q. Toqaev qaı laýazymda bolsa da, jaýapkershilik pen kásibı sheberliktiń úlgisin tanytyp kele jatqanyn atap ótti.

Á. Ahmetovtiń paıymynsha, Qasym-Jomart Kemeluly QR Tuńǵysh Prezıdenti Nursultan Nazarbaev somdaǵan el birligi men tutastyq týyn túzý ustap, qasıetti de, qasterli egemendigimizdi kózdiń qarashyǵyndaı saqtaıtyn, elimizdiń abyroıyn asqaqtatyn bıik parasatty Prezıdent bolýǵa qaýqarly.

Budan buryn habarlanǵandaı, QR Tuńǵysh Prezıdenti-Elbasy, «Nur Otan» partııasynyń Tóraǵasy Nursultan Nazarbaevtyń jetekshiligimen partııanyń kezekten tys HІH sezi ótti. Elbasy QR Prezıdenti Qasym-Jomart Toqaevty «Nur Otan» partııasynan aldaǵy saılaýǵa QR Prezıdenttigine kandıdat retinde usyndy.

Osy oraıda Q. Toqaev úlken úmittiń údesinen shyǵý úshin bar qajyr-qaıratyn jumsaıtynyn atap ótti.