Qazaqstan men Túrkııa bir-birine qoldaý kórsetýge ýaǵdalasty

<p>ASTANA. KAZINFORM - Memleket basshysy Túrkııa Prezıdenti Rejep Taııp Erdoǵanmen kezdesti, dep habarlaıdy <a href="https://akorda.kz/kz/memleket-basshysy-turkiya-prezidenti-rezhep-tayip-erdoganmen-kezdesti-12105121" target="_blank" rel="noopener">Aqorda.</a></p>

Memleket basshysy baýyrlas Túrkııa Prezıdentimen Baký tórinde kezdesip otyrǵanyna qýanyshty ekenin jetkizip, bıyl Qazaqstan men Túrkııa arasyndaǵy Dostyq jáne yntymaqtastyq týraly kelisimge 30 jyl tolǵanyn atap ótti.

«Qazir de baýyrlastyq qarym-qatynasymyz qarqyndy damyp jatyr. Saıası deńgeıde syndarly dıalog bar. Úkimetterimizdiń yqpaldastyǵy artyp keledi. Túrkııa — Qazaqstannyń eń iri bes saýda seriktesiniń biri. Byltyr ekijaqty saýda-sattyq 6 mıllıard dollarǵa jetti» — dedi Qasym-Jomart Toqaev.

 Sonymen qatar Prezıdent Túrkııanyń Qazaqstan ekonomıkasyna mol qarjy quıǵan negizgi ınvestorlardyń qatarynda ekenine nazar aýdaryp, túrik bıznesmenderiniń qatysýymen júzege asyrylyp jatqan ınvestıtsııalyq jobalar jeke baqylaýynda bolatynyn málimdedi.

Rejep Taııp Erdoǵan Qazaqstan men Túrkııa arasyndaǵy qarym-qatynas strategııalyq sıpatta damyp kele jatqanyn atap ótip, eki eldiń saýda-ekonomıkalyq yntymaqtastyǵyn odan ári jandandyrý úshin mol áleýet bar ekenin aıtty.

 «Qadirli baýyrym, kelesi jyly Ankarada ótetin Joǵary deńgeıdegi strategııalyq yntymaqtastyq keńesiniń 5-shi otyrysy barysynda aýyl sharýashylyǵy, qorǵanys, energetıka, kólik-logıstıka, sondaı-aq mádenı-gýmanıtarlyq salalarda mańyzdy kelisimderge qol jetkizetinimizge senimdimin. Biz Qazaqstanmen aradaǵy saýda aınalymyn 15 mıllıard dollarǵa deıin arttyrýǵa umtylamyz», — dedi Túrkııa Prezıdenti.

Bul rette Rejep Taııp Erdoǵan túrik kompanııalary Qazaqstan ekonomıkasynyń ártúrli sektorynda tabysty jumys istep jatqanyna toqtaldy. Onyń aıtýynsha, túrik bıznesmenderi Qazaqstandaǵy aýyl sharýashylyǵy salasynyń áleýetin ıgerý, AES salý jáne munaı-gaz tasymaly baǵytynda tájirıbe bólisip, ózara tıimdi seriktestik qurýǵa daıyn.

 Budan bólek memleketter basshylary halyqaralyq jáne aımaqtyq kún tártibindegi ózekti máseleler jóninde pikir almasyp, kópjaqty qurylymdar aıasynda bir-birine qoldaý kórsetý jóninde ýaǵdalasty.

Eske salaıyq, búgin Prezıdent Qasym-Jomart Toqaev Dúnıejúzilik klımat sammıtine qatysý úshin Bakýdegi olımpıadalyq stadıonǵa bardy. Sosyn Memleket basshysy Bakýdegi Dúnıejúzilik klımat sammıtinde sóz sóıledi. Klımattyń ózgerýi jónindegi BUU-nyń negizdemelik konventsııasyna qosylýshy taraptardyń 29-shy konferentsııasy aıasynda QR Prezıdenti Qasym-Jomart Toqaev Fınlıandııa Prezıdenti Aleksandr Stýbbpen kezdesý ótkizdi. Sondaı-aq Qasym-Jomart Toqaev SOP29 cammıtinde birqatar eldiń basshylarymen áńgimelesti.