Toqaev aýylda jer bólý týraly: «Barmaq basty, kóz qysty» degendi múldem doǵarý qajet

ASTANA. QazAqparat – Memleket basshysy Qasym-Jomart Toqaev Úkimettiń keńeıtilgen otyrysynda jer bólýdiń monıtorıngtik kartasyn jasaýdy tapsyrdy. Bul karta birinshi kezekte aýyldardaǵy jaıylym tapshylyǵyn joıýy kerek, dep habarlaıdy QazAqparat tilshisi.

«Jalpy, «Barmaq basty, kóz qysty» degendi múldem doǵarý qajet. Ózara ymyralasqan, astyrtyn sheshim qabyldaýǵa bolmaıdy. Jekelegen sharýashylyqtardyń emes, aýyl turǵyndarynyń múddesi birinshi orynda turýǵa tıis. Aýyl jurtynyń kópshiliginde jer úlesi bar. Biraq halyq onyń ıgiligin kóre almaı otyr», - dedi Memleket basshysy.

Qasym-Jomart Toqaev azyq-túlik qaýipsizdigi búkil álem boıynsha basty máselege aınalǵanyn eske saldy.

«Bıyl bizdiń elde astyq mol shyqty. Biraq eginniń ortasha shyǵymy áli de tómen. Bul salada zamanaýı tehnologııany qoldaný óte mańyzdy. Sharýalardy osyǵan yntalandyrý kerek.

Sondaı-aq tyńaıtqyshtyń qoljetimdi bolýyn qamtamasyz etken jón. Aýyl sharýashylyǵy ónimin óńdeý isin jaqsartýǵa basa nazar aýdarý qajet. Memleket jyl saıyn agroónerkásip keshenin damytýǵa 350 mıllıard teńgeden astam sýbsıdııa bóledi. Soǵan qaramastan, tereń óńdeý óndirisi damyp jatqan joq», - dedi Prezıdent.

Aıta keteıik, búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.