Toqaev aýyl sharýashylyǵy salasyndaǵy qordalanǵan máselelerdi atady

NUR-SULTAN. QazAqparat – Úkimet aýyl sharýashylyǵy jerlerin tolyqqandy ekonomıkalyq aınalymǵa engizýdiń ózge ádis-tásilderin ázirleýi tıis. Bul týraly búgin Qazaqstan halqyna Joldaýyn jarııa etken QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Kelesi jyly aýyl sharýashylyǵy maqsatyndaǵy jerdi paıdalaný máselesi boıynsha Jer kodeksiniń keıbir normalaryna engizilgen moratorıı kúshin joıady. Jerimiz sheteldikterge satylmaıdy. Biraq, Úkimet aýyl sharýashylyǵy jerlerin tolyqqandy ekonomıkalyq aınalymǵa engizýdiń ózge ádis-tásilderin ázirleýi tıis. Agrarlyq sektorǵa ınvestıtsııa tartý aýadaı qajet. Kásibı mamandardyń tapshylyǵy, sonymen qatar agrarlyq ǵylymnyń oıdaǵydaı damymaýy - osy saladaǵy qordalanǵan máseleler», - dedi Memleket basshysy.

QR Prezıdentiniń atap ótýinshe, osy baǵytta atqarýshy bılik tarapynan naqty sharalar qabyldanýy kerek,

«Tehnologııalyq turǵydan eskirgen sýǵarý júıesi úlken kedergi keltirip otyr. Sýdyń 40 paıyzy dalaǵa ketip jatatyn kezder bolady. Onsyz da sý tapshylyǵy zardabyn tartyp otyrǵan elimiz buǵan jol bere almaıdy. Osy salanyń normatıvtik-quqyq turǵydan rettelýin qamtamasyz etip, zamanaýı tehnologııalar men ınnovatsııany engizý úshin ekonomıkalyq yntalandyrý sharalaryn ázirleý qajet», - dedi Qasym-Jomart Toqaev.