Toqaev aýyl halqynyń mal jaıatyn jer tappaı otyrǵanyna alańdaýshylyq bildirdi

KÓKShETAÝ. QazAqparat – Qazaqstan Prezıdenti Qasym-Jomart Toqaev osy sebepti Úkimet berilgen jerlerdi baqylaýǵa alyp, jeke azamattar mal jaıa alatyndaı qajetti normatıvti ustanýy kerek dep esepteıdi, dep habarlaıdy QazAqparat tilshisi.

«Elde aýyl sharýashylyǵy tehnıkasyna qajettilik zor. Sol sebepti, Aýyl sharýashylyǵy mınıstrligi QazAgro júıesi arqyly aýyl sharýashylyǵy taýar óndirýshileri úshin qajetti tehnıkany óndirip, satý boıynsha qarjylandyrý mehanızmin jolǵa qoıýy kerek», - dedi Qasym-Jomart Toqaev Aqmola oblysyn damytý máseleleri jónindegi keńeste.

Qasym-Jomart Toqaev sonymen qatar, qazirgi tańda Qazaqstanda agrarlyq sektordy damytýǵa - tuqym ósirý sharýashylyǵyna, suryptardy jańartýǵa, mıneraldy tyńaıtqyshtarǵa jyl saıyn qyrýar qarajat bólinip jatqanyn eske saldy. Prezıdenttiń aıtýynsha, osyǵan qaramastan, bıdaıdyń ortasha ónimdiligi gektaryna 12 tsentnerden aspaı tur.

«Aýyl sharýashylyǵy mınıstrligi agrarly óńirlerdiń ákimdikterimen birge AÓK salasyndaǵy eńbek ónimdiligin arttyrý boıynsha naqty sharalardy qabyldaýy kerek», - dedi Prezıdent.

Qasym-Jomart Toqaev sonymen qatar, Aqmola oblysyndaǵy jaıylym jerleriniń kólemi shamamen 4,5 mln ga ekenin, sonyń 88 paıyzy paıdalanylyp otyrǵanyn atap ótti.

«Aýyldyq eldi mekenderde turǵyndar mal jaıatyn jer tappaı qınalýda. Úkimet berilgen jerlerdi baqylaýǵa alyp, jeke azamattar mal jaıýǵa múmkindik alý úshin qajetti normatıvti ustanýy kerek», - dedi Memleket basshysy.