Toqaev: Ár adamǵa birdeı múmkindik beretin qoǵam qalyptastyrý - saıasatymyzdyń tuǵyrly qaǵıdaty

<p>ASTANA. KAZINFORM - Elimizdiń bolashaqtaǵy beınesin &laquo;Ádiletti Qazaqstan &ndash; Adal azamat &ndash; Ozyq oıly ult&raquo; degen úshtaǵan uǵym arqyly sıpattaýǵa bolady. Bul týraly Memleket basshysy Qasym-Jomart Toqaev Ulttyq quryltaıdyń úshinshi otyrysyndaǵy sózinde aıtty, dep habarlaıdy Aqordanyń baspasóz qyzmeti.&nbsp;</p>

«Árıne, elimizdiń bolashaqtaǵy beınesi san qyrly, ony árkim árqalaı túsinýi múmkin. Alaıda onyń negizgi sulbasyn «Ádiletti Qazaqstan – Adal azamat – Ozyq oıly ult» degen úshtaǵan uǵym arqyly sıpattaýǵa bolady. Bul úsheýi bir-birinen bastaý alady jáne ózara tyǵyz baılanysty.

Elimiz strategııalyq baǵdarynan eshqashan aýytqymaıdy. Biz myqty demokratııalyq ınstıtýttary jáne damyǵan quqyqtyq júıesi bar Ádiletti memleket quramyz. El ishinde zań men tártip qatań saqtalady. Bul – saıasatymyzdyń tuǵyrly qaǵıdaty. Biz barshaǵa jáne árbir adamǵa birdeı múmkindik beretin qoǵam qalyptastyramyz. Adal azamattar tabandy eńbegimen elimizdiń damýyna óz úlesin qosady.

Biz «birligimiz – áralýandyqta» degen qaǵıdany berik ustanyp, elimizdegi beıbitshilik pen kelisimdi saqtaıtyn bolamyz. Túrli dinder men konfessııalardy jaqyndastyrýdy jáne qazirgi zamanǵy ózekti máselelerge qatysty dıalog ornatýdy kózdeıtin mártebeli mıssııamyzdy atqara beremiz.

Biz azamattarymyzdyń ál-aýqatyn arttyratyn, barsha álemniń kásipkerleri, ınvestorlary men talantty adamdary qyzyǵatyn ashyq ári damyǵan ekonomıka quramyz. Búkil qoǵam bolyp jemqorlyqqa qarsy kúresti jalǵastyramyz.

Bizge jáne urpaǵymyzǵa eshkim syrttan kelip jarqyn bolashaqty jasap bermeıdi. Qaǵıdamyz – ádildik, tiregimiz – jaýapkershilik, maqsatymyz – órleý. Elimiz osy qundylyqtardy berik ustana otyryp, damý kókjıegin sózsiz keńeıte túspek. Al árbir adal adam adal eńbegimen adal tabysqa jetedi», - dedi Memleket basshysy.