Toqaev apat ornynan habar taratqan jýrnalıster týraly: Bul – kásipke adaldyqtyń shynaıy kórinisi

ASTANA. QazAqparat - Aqordada jýrnalısterdi BAQ kásibı merekesimen quttyqtaǵan Qasym-Jomart Toqaev memlekettiń saıası reformalar aıasynda sóz bostandyǵyn qorǵaý úshin qajetti shara qabyldap jatqanyn aıtty, dep habarlaıdy QazAqparat.

«Azamattardyń aqparatty erkin alýy, pikirin ashyq jetkizýi, oı erkindigi – Ádiletti Qazaqstannyń aıqyn kórinisi. Elimizde qalamyn qarýyna aınaldyrǵan tilshiler az emes. Keıde olardyń jazǵan maqalasynan, daıyndaǵan reportajynan keıin ózekti máseleler jedel túrde sheshimin taýyp jatady. Ondaı tilshilerdi Adal azamattar desek, artyq bolmaıdy. Men bul týraly Túrkistanda ótken Ulttyq quryltaıda aıttym», - dep atap ótti Memleket basshysy.

Ol sondaı-aq jalǵan, feık aqparat taratyp, jurtty dúrliktiretin adamdar bar ekenin tilge tıek etti.

«Jýrnalıster árdaıym tótenshe oqıǵalardyń aldyńǵy shebinde júredi. Olar pandemııa kezinde, Qostanaı, Abaı oblystaryndaǵy tabıǵat apaty bolǵan kezde jedel aqparat taratty. Keıde jeke basyna qaýip tónse de, elge habar jetkizdi. Bul – patrıotızmniń, kásipke adaldyqtyń shynaıy kórinisi. Biz elimizdi órkendetý úshin aýqymdy sharalardy qolǵa aldyq. Árıne, atqaratyn jumys, eńseretin kedergi az emes. Degenmen osy jumysty, onyń nátıjesin halyqqa saýatty ári ýaqytyly túsindirý mańyzdy. Sonymen qatar azamattardyń kókeıinde júrgen ózekti máseleni, túrli túıtkildi bılikke jetkizý de – tilshi qaýymnyń mindeti. Osylaısha, biz «Halyq únine qulaq asatyn memleket» tujyrymdamasyn tıimdi júzege asyra alamyz. Sondyqtan halyq pen bılik arasyndaǵy altyn kópirge aınalǵan medıa salasynyń mamandaryna zor jaýapkershilik júkteledi», - dep atap ótti Prezıdent.