Toqaev áleýmettik jelilerdegi jalǵan aqparattar týraly aıtty
«Tórtinshi ónerkásiptik revolıýtsııa dáýiri qoǵam men BAQ aldyna bıik mindetter qoıyp otyr. Tehnologııalyq, ekonomıkalyq jáne áleýmettik aýqymdy ózgerister burynǵy ádetter men taptaýryn kózqarastardan arylyp, jańasha oılaýdy talap etedi. Prezıdent óziniń Joldaýynda tsıfrlyq tehnologııalardyń dendep enýine baılanysty qazaqstandyqtardy jahandyq ózgerister men qaterlerge daıyn bolýǵa shaqyrdy. Sondyqtan tsıfrlandyrý ıdeıasynyń mán-mańyzyn qalyń buqaraǵa jetkizýde jýrnalısterge asa jaýapty mindet júktelip otyr. Tehnologııalyq turǵydan jańarý buqaralyq aqparat quraldaryna da áser etýde», - dedi Q. Toqaev Senatta baılanys jáne aqparat salasy qyzmetkerleriniń merkesine oraı ótken saltanatty jıynda.
Onyń sózine qaraǵanda, búgingi kúni dástúrli BAQ-ty áleýmettik jelilerden bólip tastaıtyn shekaralar da azaıyp barady. Qazirgi kezde gezetterdiń, telearnalar men radıo stansalardyń elektrondy nusqasynyń bolýy zańdy. Olar tipti, dástúrli aqparat quraldarynan da tanymal bolýda.
«Qazirgi kezde aqparat aǵymdary úshin memlekettik shekara uǵymy joq. Jańa jaǵdaıda jaǵymsyz qubylystardy aıla-sharǵymen jaǵymdy etip kórsetip, qoǵamdyq oń pikir qalyptastyrý qaýpi kúrt ósip barady. Sarapshylar baqylanbaıtyn áleýmettik jelilerde jalǵan jańalyqtar men teris nasıhattyń dendep ketýi týraly eskertip otyr. Azǵyrý men arbaýǵa negizdelgen mundaı aqparat saıası maqsattarda jıi qoldanylady», - dep toqtaldy Toqaev.
Onyń paıymynsha, búgingi áleýmettik jeliler arqyly taraıtyn jónsiz aqparat zamanynda mundaı qaýipti qubylystar el ishinde beleń alýy múmkin.
«Meniń oıymsha, qazaqstandyq BAQ álemdegi eń joǵary standarttardy baǵdarǵa alýy tıis. Elbasy elimizdiń dástúrli qundylyqtaryn saqtaı jáne ulyqtaı otyryp, qoǵamnyń rýhanı ómiriniń jańarýyna baǵyttalǵan «Rýhanı jańǵyrý» tujyrymdamasyn jarııalady. Osy tujyrymdamany iske asyrýda aqparat quraldarynyń róli erekshe. Ideologııalyq keńistikti ulttyq álemderge bólý úrdisteri týyndap turǵan kezde - «Rýhanı jańǵyrý» tujyrymdamasynyń Qazaqstan úshin mańyzy zor», - dedi Senat tóraǵasy.
Osy oraıda, ol Memleket basshysynyń «Egemen Qazaqstan» gazetinde jaryq kórgen baǵdarlamalyq maqalasynan keıin, birqatar jobalar boıynsha aýqymdy jumystar atqarylǵanyn eske salyp ótti.
«Rýhanı jańǵyrý» qoǵamda qyzý qoldaý tapty jáne ony belsendi túrde jalǵastyrý úshin aýqymdy isterdi atqarýymyz qajet»,- dep túıdi Qasym-Jomart Toqaev.
Budan buryn habarlanǵandaı, Senat tóraǵasy birqatar BAQ ókilderin marapattady.