Toqaev Ahmet Jubanov atyndaǵy qazaq mýzykalyq mektep-ınternatty mereıtoıymen quttyqtady
Bıyl Ahmet Jubanov atyndaǵy daryndy balalarǵa arnalǵan mamandandyrylǵan qazaq mýzykalyq mektep-ınternatynyń ashylǵanyna 60 jyl toldy.
Mereıtoıǵa oraı erekshe kontsert uıymdastyryldy. Qazaqstannyń Mádenıet jáne aqparat mınıstri Aıda Balaeva Prezıdent Qasym-Jomart Toqaevtyń quttyqtaý hatyn oqyp berdi.
— Halqymyzdyń birtýar perzenti Ahmet Jubanovtyń bastamasymen ashylǵan bilim ordasy búginde daryndy balalardy tárbıeleýdiń ózindik dástúrin qalyptastyrǵan irgeli oqý ornyna aınaldy. Sizderge qazaqtyń mýzyka ónerin damytý jolyndaǵy eseli eńbekterińiz úshin zor rızashylyǵymdy bildiremin. Aldaǵy ýaqytta da daryndy ári sanaly urpaq ósirip, el ıgiligine aıanbaı qyzmet ete beresizder dep senemin, — delingen Memleket basshysynyń hatynda.
Sondaı-aq, Qasym-Jomart Toqaev túrli baıqaýlarda top jaryp, halqymyzdyń mereıin asyrǵan mektep shákirtterin búkil elimiz maqtan tutatynyn atap ótti.
Mereıtoıǵa oraı mekteptiń birqatar ustazdaryna memlekettik marapattar tabystaldy. Mektep-ınternattan 60 jyl ishinde myńǵa jýyq mýzykant túlep ushqan. Oqý ornynda bilim alǵan 800-den astam ónerpaz halyqaralyq jáne respýblıkalyq konkýrstar men festıvalderdiń laýreaty atanǵan. Qazirgi tańda mektepte 500-ge jýyq daryndy bala bilim alýda.
Oqý orny «Teorııa jáne kompozıtsııa», «Skrıpka jáne alt», «Vıolonchel jáne kontrabas», «Arnaıy fortepıano», «Úrmeli jáne urmaly aspaptar», «Halyq aspaptary», «Mindetti fortepıano», «Hor dırıjerlyǵy» jáne «Kontsertmeısterlik sheberlik» sekildi 10 baǵyt boıynsha kásibı mýzykanttardy daıyndaıdy.
Eske salsaq, budan buryn Qasym-Jomart Toqaev Laos prezıdentin jáne BAÁ Prezıdenti sheıh Muhammed ben Zaıd Ál Nahaıany quttyqtady.