Toǵyz aıda 11 mln tonna munaı ónimderi óndirildi

ASTANA. QazAqparat – Bıyl 9 aıda 11,1 mln tonna munaı ónimderi óndirildi. Bul týraly Úkimet otyrysynda QR Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«Bıyldyń qańtar-qyrkúıeginde 11,1 mln tonna munaı ónimderi óndirildi. Bul kórsetkish byltyrǵy sáıkes kezeńine qaraǵanda 107,8%-dy qurady. Atap aıtqanda, munaı óńdeý jáne munaı ónimderin óndirý kólemi ósti», - dedi B. Aqsholaqov.

Osy oraıda avtokólik benzıni 3,7 mln tonna kóleminde óndirilip, 105,9 paıyz boldy. Al dızel otyny 4 mln tonna ( 108,3%), avıaotyn 517 myń tonna (119,1%), mazýt boıynsha 2,1 mln tonna (117,3%) shyǵaryldy.

«Buǵan qosa, óńirlerde janar-jaǵarmaı tapshylyǵyna jáne baǵalardyń negizsiz ósýine jol bermeý boıynsha birqatar sharalar qabyldandy. 2023 jyldyń qańtaryna deıin janar-jaǵarmaı quıý stantsııalaryndaǵy áleýmettik mańyzy bar munaı ónimderiniń shekti bólshek saýda baǵalary saqtalady. Shekara mańyndaǵy elderge dızel otynyn áketýge jol bermeý maqsatynda onyń baǵasy saralanyp, janarmaı quıý stantsııalary arqyly dızel otynyn ótkizýdi esepke alýdyń elektrondyq júıesi iske qosyldy», - dedi mınıstr.

Sonymen qatar jyl sońyna deıin munaı ónimderin avtomobıl kóligimen eksporttaýǵa tyıym salý merzimi uzartyldy.

«Memleket basshysynyń tapsyrmalaryn oryndaý aıasynda janar-jaǵarmaı materıaldary naryǵyn reformalaý, onyń ishinde deldaldardy joıý jóninde sharalar kesheni qabyldandy. Jyl sońyna deıin tıisti zańnamalyq normalar qabyldanatyn bolady», - dedi vedomstvo basshysy.

Bıylǵy qańtar-qyrkúıek aılarynda bıtým óndirý kólemi 707 myń tonnany qurady.