Tobylda ıttiń 3 jasar qyzdy jaraqattaýyna qatysty tergeý bastaldy
«QR Qylmystyq kodeksiniń 114-baby «Densaýlyqqa abaısyzda zııan keltirý» boıynsha sotqa deıingi tergeý bastaldy. It ıesi anyqtaldy», - delingen Qostanaı oblysy Polıtsııa departamentiniń málimetinde.
Eske salaıyq, oqıǵa 6 mamyr kúni Tobyl qalasynda bolǵan edi. Pıtbýl 3 jasar qyzdyń betin talap tastaǵan.
Qostanaı oblystyq balalar aýrýhanasy hırýrgııa bóliminiń meńgerýshisi Igor Belobrjıtskııdiń aıtýynsha, bala aýyr halde túsken.
«Qyz aýyr halde jetkizildi. Qatty shoshynǵan. Erni, beti jyrtylǵan. Shuǵyl operatsııa jasaldy. Erni men beti tigildi. Bala birneshe kún jansaqtaý bóliminde jatty. Qazirgi jaǵdaıy birqalypty. Bala belsendi, júgirip júr, tamaqtanady. Tigisterdi qadaǵap otyrmyz. Qabyný joq. Ádette ıt talaǵannan keıin mundaı jaralar irińdeıdi, ásirese bet, bul óte qaýipti. Infektsııa mıǵa túsedi. Bul joly qyzda bári jaqsy. Temperatýra joq. Birneshe kúnnen keıin tigisterdi alamyz. Aýrýhanadan shyǵatyn da bolar», - degen bolatyn I.Belobrjıtskıı.