TMRA basshysy agenttik departamentteriniń basshylaryn synǵa aldy
Buǵan vedomstvonyń jáne onyń aýmaqtyq bólinisteriniń aǵymdaǵy jylǵy 9 aıdaǵy jumysynyń qorytyndylary sebep boldy.
Agenttik aldynda TKSh salasyndaǵy normatıvten tys shyǵyndardy joıý jáne normatıvti tómendetý, kóppáterli turǵyn úı sektorynyń esepteý prıborlarymen jaraqtanýy deńgeıin kóterý, otyn shyǵynyn tómendetý, teńdestirilgen tarıfterdi bekitý sııaqty óte mańyzdy mindetter tur. Sondaı-aq osy jyldardyń ishinde qordalanǵan negizgi aktıvterdiń tozýyn tómendetý máselesi de ótkir bolyp otyr.
«Búgingi tańda bul problemany tarıf arqyly bir kún ishinde sheship tastaý múmkin emes ekenin túsinemiz, óıtkeni bul retteletin qyzmetterge tarıfterdiń birneshe ese ósýine ákep soǵady. Sondyqtan da qalyptasqan jaǵdaıdan shyǵý joldarynyń biri ınvestıtsııalyq baǵdarlamalardy júzege asyrý úshin zaemdyq qarajattardy tartý bolmaq. Búgingi kúni tıisti normatıvtik quqyqtyq baza jasalǵanmen, bul tetik paıdalanylmaı otyr deýge bolady», - dedi TMRA tóraǵasy.
«Júrgizilgen taldaýlar tarıfterdi kótermeı-aq nesıe resýrstaryn tarta otyryp, keń aýqymdy jańartý júrgizýge bolatynyn kórsetip otyr, sóıtip, otyn men elektr energııasyna shyǵyndardy tómendetýge bolar edi. Erekshe tártipke sáıkes nesıe amortatsııa men tabys esebinen óteledi, al sizder bul rezervterdi kórmeı, tarıfterdi arttyryp qana, jeńil jolmen kelesizder. Buǵan jol berýge bolmaıdy!», - dedi M.Ospanov.
Alqada normatıvıvten tys shyǵyndar ahýalyna baılanysty kóptegen suraqtar týyndady, atap aıtqanda negizgi quraldardyń 70-80 paıyzy tozǵan kezde ony joıýǵa qalaı qol jetkizildi.
«Keıbir aýmaqtyq komıssııalardyń basshylary monopolıstermen ýaǵdalastyq jasap, olardyń jeteginde ketkendeı áser týǵyzady. Sonan kelip, endi bazalyq jáne bazalyq emes sýbektiler boıynsha normadan tys shyǵyndar joqtyǵy jóninde málimetterdi kórsetedi», - dedi M.Ospanov departamentter basshylaryna qarata. Mundaı málimetterdi Almaty, Aqtóbe, Qaraǵandy, Pavlodar, Mańǵystaý jáne Jambyl oblystary boıynsha departamentter keltirgen.
«Baqylaý jáne sot tájirıbesi - Agenttiktiń búkil qyzmeti osyǵan súıenedi, - dedi TMRA basshysy, alqa otyrysyn jalǵastyra otyryp. - Zańnamada alǵa qoıylǵan mindetterdi júzege asyrýdyń quraldary kózdelgen. Alaıda búgingi kezde barlyq aımaqtarda derlik baqylaý sharalaryna qalaı-solaı qaraý beleń alyp otyr».
Vedomstvonyń baqylaý jáne talap etý jumystary departamentiniń málimetteri boıynsha, esepti kezeńde ákimshilik quqyq buzýshylyqtar boıynsha 195 is jóninde qaýly shyǵarylǵan. Aıyppul túrindegi ákimshilik jazalardyń jalpy somasy 1 847 581 808 teńgeni quraıdy. Anyqtalǵan buzýshylyqtardyń jalpy somasy 3 mlrd. 200 mln. teńgeden asady.
Aýmaqtyq bólinister dırektorlarynyń qanaǵattanǵysyz jaýaptaryn tyńdaǵannan keıin M.Ospanov jaýapty hatshyǵa mundaı buzýshylyqqa jol bergen basshylardyń jeke jaýapkershiligin qaraýǵa tapsyrma berdi.
Sonymen birge alqada tarıftik saıasatty jetildirýge, sybaılas jemqorlyqqa qarsy turý sharalaryna, memlekettik sımvoldar týraly zańnamany qamtamasyz etýge qatysty basqa da ózekti máseleler qaraldy.
«TMRA basshysy birqatar jiti tapsyrmalar berdi jáne Memleket basshysy men Úkimet alǵa qoıǵan mindetterdi júzege asyrýda oń nátıjelerge qol jetkizý jónindegi jumystardy jalǵastyrý qajettigin atap kórsetti», - delingen taratylǵan habarlamada.