TMD jáne Ortalyq Azııada referendým ótkizip jatqan birden-bir elmiz – Erlan Qarın
«Kez kelgen referendýmǵa mańyzdy másele shyǵarylady. Búgingi referendýmdaǵy AES salý máselesi de óte mańyzdy. Qabyldanǵan sheshimge baılanysty elimizdiń ekonomıkalyq damý baǵyty aıqyndalady. Referendýmǵa shyǵarylyp otyrǵan máseleden bólek, referendýmdy ótkizýdiń ózi de mańyzdy. Biz TMD jáne Ortalyq Azııa elderi boıynsha referendým ótkizip jatqan birden-bir elmiz. Munyń ózi kóp nárseni ańǵartady, ıaǵnı memleket pen qoǵam arasynda jańa saıası mádenıettiń qalyptasýyna yqpaly bar», - dedi Erlan Qarın daýys bergen soń BAQ ókilderiniń saýalyna jaýap bere turyp.
Sondaı-aq, Memlekettik keńesshi referendýmǵa daıyndyq jan-jaqty ári uzaq júrgizilgenin aıtty.
«Búgingi referendýmda qoǵamnyń shynaıy pikiri kerek. Bul jolǵy referendým jan-jaqty uıymdastyryldy. Qazaqstannyń jańa saıası tarıhynda mundaı uzaqmerzimdi talqylaý bolǵan emes. Ádette bilesizder, qysqa merzimde jarııalanady, qysqa merzimde ótetin», - deıdi ol.
Sondaı-aq Erlan Qarın AES salýǵa qatysy referendým týraly pikir bildirdi.
«Kez kelgen eldegi saıası naýqanǵa baılanysty bireýler kelisse, bireýler kelispeı jatady, bul zańdy qubylys. Qazirgi ýaqytta álemde bolyp jatqan kóptegen eldegi saıası naýqandy baıqap qarasańyz, ol elderde de saılaýdyń ótkizilýine baılanysty túrli daý-damaılar bolyp jatady. Sondyqtan saıası naýqan bolǵannan keıin barlyǵynyń birdeı kóńilinen shyǵyp jatpaıdy, degenmen de negizgi máseleler boıynsha bizdiń elimizdegi saıası naýqandarǵa qatysty suraqtar joq dep oılaımyn», - dep jaýap berdi Erlan Qarın referendýmda daýys bergen soń BAQ ókilderiniń saýalyna jaýap bere turyp.
Sonymen qatar Memlekettik keńesshi búgingi referendýmnyń ashyq ári ádil ótetinine memleket kepil bolatynyn aıtty.
«Búgingi referendýmda qoǵamnyń shynaıy pikiri kerek. Bul jolǵy referendým jan-jaqty uıymdastyryldy. Qazaqstannyń jańa saıası tarıhynda bundaı uzaqmerzimdi talqylaý bolǵan emes. Ádette bilesizder qysqa merzimde jarııalanady, qysqa merzimde ótetin», - deıdi ol.
Aıta keteıik, Astanada Ulttyq akademııalyq kitaphanada ornalasqan №164 ýchaskesinde daýys berý saǵat 7:00-de bastaldy. Atalǵan ýchaskede 2114 daýys berýshi tirkelgen. Sonymen qatar 26 baıqaýshy qatysyp otyr, onyń ishinde halyqaralyq baıqaýshylar da bar. Alǵash bolyp daýys bergen elorda turǵynyna kishigirim syılyq berildi.
Eske salaıyq, búgin qazaqstandyqtar atom elektr stantsııasyn salý máselesi boıynsha jalpyulttyq referendýmda daýys beredi.
Ortalyq referendým komıssııasy tóraǵasynyń orynbasary Konstantın Petrov eldiń barlyq óńirinde Qazaqstanda atom elektr stantsııasyn salý máselesi boıynsha jalpyulttyq referendým bastalǵanyn resmı málim etti.
Buǵan deıin habarlanǵanyndaı, Premer-mınıstr Oljas Bektenov Astana qalasyndaǵy Oqýshylar saraıynda ornalasqan №61 ýchaskede daýys berdi.
1 shildedegi jaǵdaı boıynsha el kóleminde 12 176 968 adam referendýmda daýys berýge haqyly.