TMD Úkimetaralyq keńesi qurylystaǵy jikteýdiń qazaqstandyq biryńǵaı júıesin maquldady

NUR-SULTAN. QazAqparat - Onlaın rejımde ótken TMD-ǵa qatysýshy elderdiń qurylys qyzmetindegi yntymaqtastyq jónindegi Úkimetaralyq keńesiniń (Úkimetaralyq keńes) XI otyrysynda qatysýshylar qurylystaǵy jikteý men kodtaýdyń biryńǵaı júıesin qabyldaýdy maquldady, dep habarlaıdy QazAqparat QR Indýstrııa jáne ınfraqurylymdyq damý mınıstrliginiń resmı saıtyna silteme jasap.

Úkimetaralyq keńes TMD-ǵa qatysýshy elderdiń qurylys jáne standarttaý jónindegi ulttyq organdaryna «Qurylystaǵy aqparattyq modeldeý. Aqparatty jikteý jáne kodtaý qaǵıdattary» memleketaralyq standartyn (MEMST) qaraýdy jáne engizý úshin daýys berýge qatysýdy usyndy.

Jikteý men kodtaýdyń biryńǵaı júıesin engizý týraly usynysty alǵash ret 2019 jyly Úkimetaralyq keńestiń XXXIX otyrysynda Qazaqstan Respýblıkasy Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabbat Jaıymbetov aıtqan bolatyn. Úkimetaralyq keńeste Qurylysta jikteý men kodtaýdyń biryńǵaı júıesin (QJKBJ) ázirleý boıynsha Qazaqstan Respýblıkasynyń oń tájirıbesi atap ótildi jáne osy baǵyttaǵy jumysty jalǵastyrý usynyldy.

«QazQSǴZI» AQ bazasynda 2018 jyldan bastap qurylys keshenindegi tehnıkalyq retteý problemalary boıynsha TMD-ǵa qatysýshy memleketterdiń Bazalyq uıymy janynda aqparattyq modeldeý salasyndaǵy normatıvtik-tehnıkalyq bazany damytý jónindegi Komıssııa (Komıssııa) jumys isteıdi.

2020 jylǵy 29 qazanda Komıssııa otyrysynda «Qurylystaǵy aqparattyq modeldeý. Aqparatty jikteý jáne kodtaý qaǵıdattary» jobasyn 8 memleketten kelgen qurylys salasyndaǵy 30 jetekshi sarapshy qarady. Ózara pikir almasyp, MEMST-ty joǵary turǵan organdarǵa usyný jáne qujatty standarttaý jónindegi beıindi alańdarǵa ornalastyrý týraly sheshim qabyldandy.

Qujat Qurylystaǵy normalaý, standarttaý jáne sáıkestikti tehnıkalyq baǵalaý federaldy ortalyǵynyń (FSO FAM) bastamasy boıynsha Qurylystaǵy tsıfrlandyrý jáne jobalaý ǵylymı-ınjenerlik ortalyǵymen (RF) ázirlendi.

«Qurylystaǵy biryńǵaı jikteý júıesiniń negizgi róli - aqparatty komponentterge, fýnktsıonaldy jáne tehnıkalyq júıelerge bólý, olardy biregeı sáıkestendirý jáne shatasýdy azaıtý bolyp tabylady. Budan basqa, memleketaralyq standart halyqaralyq talaptarǵa sáıkes mazmuny ulttyq deńgeıde aıqyndalýy múmkin jikteý kesteleriniń nomenklatýrasyn belgileıdi»,- dep túsindirdi Aqparattyq modeldeý salasyndaǵy normatıvtik-tehnıkalyq bazany damytý jónindegi komıssııanyń basshysy Aleksandr Shahnovıch.

Qurylystaǵy halyqaralyq standarttarǵa negizdelgen jikteý men kodtaýdyń atalǵan júıesi TMD-ǵa qatysýshy elderge zańnamany jáne árbir eldiń ulttyq talaptaryn eskere otyryp, aqparattyq modelderde aqparatty qurylymdaý máselelerinde biryńǵaı qaǵıdattar men tásilderdi qalyptastyrýǵa múmkindik beredi dep boljanýda.