TMD Úkimet basshylary keńesiniń otyrysynda 15 qujatqa qol qoıyldy
«Búgin TMD Úkimet basshylary keńesiniń otyrysynda memleketterdiń ekonomıkasy salasyndaǵy óte ózekti máseleler talqylandy. Sonymen qatar, ıadrolyq nysandardyń qaýipsizdigi, beıbit maqsattarda ǵarysh keńistigin birlese paıdalaný taqyryptary qamtyldy. Munymen qosa, Táýelsiz Memleketter Dostastyǵy qyzmetiniń birqatar qarjylyq máselelerin reglamentteıtin qujattarǵa qol qoıyldy», - dedi S. Lebedev.
Budan bólek ol gýmanıtarlyq saladaǵy yntymaqtastyq boıynsha tıisti talqylaýlar bolǵanyn atap ótti.
«Jalpy, 15 qujatqa qol qoıyldy jáne olardyń barlyǵy óte mańyzdy. Negizi, bıyl Tájikstannyń atalǵan keńeske tabysty tóraǵalyǵyn atap ótken jón. Olardyń jetekshiligimen barlyq qujattar tyńǵylyqty pysyqtalyp, qabyldaýǵa usynyldy», - dedi TMD-nyń atqarýshy hatshysy.
Buǵan deıin habarlaǵanymyzdaı, Táýelsiz memleketter dostastyǵy Úkimet basshylary keńesiniń shaǵyn quramdaǵy otyrysy ótip, onda TMD aıasyndaǵy ekonomıkalyq ózara is-qımyldyń ózekti máselelerine qatysty pikir almasylǵan bolatyn.
Al keńeıtilgen quramdaǵy otyrysta Tájikstan Premer-Mınıstri Kohır Rasýlzada TMD-ǵa múshe memleketter arasyndaǵy saýda-sattyq kedergilerin joıý baǵytyndaǵy jumystarǵa toqtaldy.
Sonymen qatar, otyrys barysynda TMD elderinde ıadrolyq apat kezinde habarlandyrýdyń biryńǵaı júıesi engiziletini málim boldy.