TMD tóraǵalyǵy Qyrǵyzstanǵa berildi

ASTANA. QazAqparat - Qazaqstan Premer-Mınıstri Kárim Másimov búgin Dýshanbe qalasynda ótip jatqan TMD Úkimet basshylary keńesiniń kezekti otyrysyna qatysýda, dep habarlaıdy primeminister.kz.

Keńeıtilgen quramdaǵy otyrysta sóılegen sózinde Kárim Másimov atalǵan is-sharamen Qazaqstan TMD-ǵa tóraǵalyǵyn aıaqtaıtynyn aıtyp ótti.

«Jaqynda ǵana TMD Úkimet basshylary keńesiniń aıasynda tóraǵalyq estafetasy resmı túrde bizdiń qyrǵyzstandyq áriptesterimizge tapsyrylǵan bolatyn. Osy oraıda qazaqstandyq tarap tóraǵalyq etýine qoldaý kórsetkenderi úshin, kópjaqty yntymaqtastyqty tereńdetý boıynsha syndarly usynystar jasaǵany úshin Dostastyq boıynsha áriptesterimizdiń bárine alǵys bildiremin», - dedi K.Másimov.

Budan ózge, Úkimet basshysy Qyrǵyzstanǵa 2016 jyly TMD-ǵa tóraǵalyq etý qurmetti mindetin atqarýda sáttilik tiledi.

«Jalpy, búgingi otyrystyń kún tártibi kóp qyrly, bizdiń yntymaqtastyǵymyzdyń túrli salalary qozǵaldy jáne qabyldanǵan qujattardy júzege asyrý Dostastyqty damytýǵa qosymsha serpin bereri sózsiz», - dep basa aıtty Kárim Másimov.

Otyrys qatysýshylary TMD-ǵa qatysýshy elderdiń áleýmettik-ekonomıkalyq, gýmanıtarlyq jáne quqyq qorǵaý salalaryndaǵy ózara is-qımyldy odan ári damytýǵa qatysty shamamen 40 máseleni qarady.