TMD Syrtqy ister mınıstrleri Almatyda kezdesedi

MINSK. BELTA - QazAqparat – TMD Syrtqy ister mınıstrleri keńesiniń (SІMK) otyrysy 2020 jyly 3 sáýirde Almatyda ótedi dep josparlanýda. Bul týraly TMD Atqarý komıtetiniń tóraǵasy – atqarýshy hatshysy Sergeı Lebedev jýrnalısterge málim etti, dep habarlaıdy QazAqparat BELTA-ǵa silteme jasap.

«Búgin biz aldaǵy otyrystyń aldyn ala josparyn ǵana talqylaımyz. Jıyn 2020 jyldyń 3 sáýirinde ótetinin josparlap otyrmyz. Bul, Qazaqstan tarapynyń usynysy, ony barlyǵy qoldady. Onda talqylanatyn mańyzdy qujattar negizinen gýmanıtarlyq jáne saıası ózara árekettestik salalaryna qatysty bolmaq», - dedi Sergeı Lebedev.

Onyń aıtýynsha, SІMK otyrysy kezinde 2019 jyly ótken Syrtqy ister mınıstrleri arasyndaǵy konsýltatsııalardyń qorytyndysy shyǵarylyp, 2020 jyly olardy ótkizý jospary talqylanady.

«Syrtqy ister mınıstrleri arasyndaǵy konsýltatsııalar turaqty túrde ótkizilip turady, shamamen eki aıda bir ret. Kún tártibinde TMD-nyń halyqaralyq qyzmetindegi ózekti máseleler kóteriledi. Jáne bul TMD Syrtqy ister mınıstrleri keńesiniń otyrysyndaǵy negizgi máselelerdiń biri bolatynyn boljap otyrmyn», - dep atap ótti Sergeı Lebedev.