TMD patentter men ınnovatsııalar bankin qurý qajet - E.Súleımenov

ALMATY. 26 qarasha. QazAqparat /Ádilet Musahaev/- Ǵylymı-tehnıkalyq aqparattar jónindegi memleketaralyq úılestirý keńesiniń tóraǵasy bolyp Ulttyq ǵylymı-tehnıkalyq aqparat ortalyǵy AQ prezıdenti Erbol Súleımenov saılandy. Bul jaıynda Almatyda ótken ǴTAÚK-niń 18-otyrysynda belgili boldy.

«Reformanyń ınnovatsııalyq-ındýstrııalyq saıasatyn júrgizip otyrǵan Qazaqstan Respýblıkasy úshin mundaı halyqaralyq uıymdarǵa tóraǵalyq jasaý jáne qatysýdyń mańyzy zor, sonymen qatar bul elimizdiń halyqaralyq bedeliniń aıqyn kórinisi», - deıdi E.Súleımenov.

ǴTAÚK qyzmetine ǵylymı-tehnıkalyq aqparattarmen memleketaralyq almasýdy damytýdyń baǵdarlamalary men jobalaryn ázirleýge basshylyq jasaý, birlesip qoldanylatyn resýrstardyń damý josparyn ázirleý men bekitý kiredi.

Jıyn barysynda ǴTAÚK qyzmetiniń aldaǵy baǵyttary men ǵylymı-tehnıkalyq aqparattarmen memleketaralyq almasýdy damytý máseleleri talqylandy.

E.Súleımenov TMD patentter men ınnovatsııalar bankin qurý týraly usynys jasady. Ol qazaqstandyq tehnologııa men patent naryǵyn keńeıtýge múmkindik beredi eken.

Atalǵan keńeske ǴTAÚK ýákiletti ókilderi, Armenııa, Belarýs, Qyrǵyzstan, Moldova, Reseı, Ózbekstan, Tájikstan, Ýkraınanyń ulttyq ǵylymı-tehnıkalyq aqparat ortalyqtarynyń basshylary qatysty.