TMD mıssııasy saılaýdaǵy baıqaý nátıjelerin jarııalady
«Saılaý barysyn TMD mııssııasynyń 196 baıqaýshysy qadaǵalady. Onyń ishinde 10 baıqaýshy uzaq merzimdi negizde jumys istedi. Olar saılaýdy uıymdastyrýshylarmen ózara is-qımyl jasap, vedomstvolardan qajetti aqparattardy aldy. Mıssııa respýblıka boıynsha halyqaralyq baıqaýshylardyń qyzmetine qajetti jaǵdaı jasalǵanyna tolyq kóz jetkizdi. Ortalyq saılaý komıssııasy saılaýǵa daıyndyq pen ony ótkizý kezinde kásibı uıymdastyrýshylyq deńgeıin kórsetti», - dep atap ótti TMD atynan baıqaýshylar mıssııasynyń basshysy Leonıd Anfımov.
Onyń sózinshe, saıası dodada básekelestiktiń joǵary bolǵany - tirkelgen jańa partııalar men ózin usynǵan kandıdattar qatarynyń kóp bolýyna baılanysty.
«Mıssııa Májilis depýtattyǵyna kandıdattardy usyný jáne tirkeý zańnama talaptaryna sáıkes júrgizildi dep esepteıdi. TMD baıqaýshylarynyń pikirinshe, barlyq tirkelgen saıası partııalardyń saılaý naýqanyna qatysýy jáne bir mandatty okrýgter boıynsha usynylatyn kandıdattar sanyna shekteýdiń bolmaýy ony básekelestik pen ashyqtyq jaǵdaıynda ótkizýdi qamtamasyz etýge múmkindik berdi», - dep mıssııanyń jumys qorytyndysyn jarııalady Leonıd Anfımov.
TMD baıqaýshylary 832 saılaý ýchaskesine baryp, qadaǵalaý júrgizgen. Nátıjesinde atalǵan mıssııa baıqaýshylary elimizde ótken Májilis saılaýy barlyq zań talaptaryna saı ótkenin jarııalady.