TMD memleketteri qupııa aqparattardy birlese qorǵaıtyn bolady

ASTANA. QazAqparat - Búgin Parlament Májilisiniń jalpy otyrysynda «Táýelsiz Memleketter Dostastyǵy sheńberinde qupııa aqparatty qorǵaý týraly kelisimdi ratıfıkatsııalaý týraly» zań jobasy maquldandy.

Atalǵan kelisimge 2013 jyly 25 qazanda Mınsk qalasynda TMD memleketter basshylary qol qoıǵan bolatyn. Al qujat Ujymdyq qaýipsizdik týraly shart uıymynyń, Shanhaı yntymaqtastyq uıymy Óńirlik terrorızmge qarsy qurylymynyń qupııa aqparattardy ózara qorǵa týraly kelisimderi negizinde daıyndalǵan.

«Zań jobasynyń maqsaty - TMD-ǵa qatysýshy memleketterdiń qupııa aqparattarynyń qaýipsizdigin qorǵaý bolyp tabylady. Al onyń oryndalýyna ár tarap ózderi aıqyndaıtyn quzyretti organdar jaýapty bolady. Qazaqstanda kelisimniń oryndalýyna jaýapty quzyretti organ bolyp Ulttyq qaýipsizdik komıteti usynylyp otyr. Óıtkeni, Ulttyq qaýipsizdik komıteti Ujymdyq qaýipsizdik týraly shart uıymynyń jáne ShYU Óńirlik terrorızmge qarsy qurylymynyń ózara qupııa aqparattardy qorǵaý týraly kelisiminiń oryndalýyna jaýapty organ», - deıdi QR Premer-Mınıstri Keńsesiniń Basshysy Erlan Qoshanov.

Zań jobasyn qabyldaý TMD sheńberinde qupııa aqparattardy qorǵaý jumysyn odan ári úılestirýge jáne kúsheıtýge yqpal etetin bolady. Qujat boıynsha qupııa aqparattardy berýdiń árbir naqty jaǵdaıy qaralyp, ol boıynsha taraptardyń múddeleri de negizge alynady. Sonymen qatar, qupııa aqparattardy berý árbir memlekettiń ulttyq zańnamasyna sáıkes júzege asyrylady.

Májilis maquldaǵan zań jobasy Senatqa joldanady.