TMD qyzmetterdiń erkin saýdasy týraly kelisimdi qabyldaýǵa daıyn
Esterińizge sala keteıik, bıylǵy jyly Qazaqstan Respýblıkasy Táýelsiz Memleketter Dostastyǵyna tóraǵalyq etedi.
Ekonomıkalyq keńestiń otyrysynda Baqyt Sultanov TMD qurylǵaly 30 jyl ishinde aýqymdy normatıvtik-quqyqtyq baza qalyptastyrylǵanyn, yntymaqtastyqtyń barlyq salalarynda aıtarlyqtaı tájirıbe jınaqtalǵanyn atap ótti.
«Ekonomıkalyq salada jahandyq ekonomıkadaǵy týrbýlenttiliktiń jaǵymsyz áserin eńserý ortaq kún tártibimizdegi ózekti másele bolyp qala beredi. Osy baǵytta ulttyq ekonomıkalardyń oń ósý traektorııasyna senimdi ený jáne ekonomıkalyq turaqtylyqty qamtamasyz etý boıynsha kelisilgen sharalardy júzege asyrý Qazaqstan tóraǵalyǵynyń basym baǵyttarynyń birine aınalady», – dedi Premer-Mınıstrdiń orynbasary.
Kún tártibindegi ózekti másele Táýelsiz Memleketter Dostastyǵyna múshe memleketterdiń qyzmetteriniń erkin saýdasy, qurylýy, qyzmeti jáne ınvestıtsııalary týraly kelisim jobasyn qaraý boldy. Kelisimge 2022 jyly TMD-nyń joǵary organdarynyń biriniń otyrysynda qol qoıý josparlanýda.
Onyń erejelerin iske asyrý erkin saýda aımaǵyn damytýdyń jáne TMD-ǵa qatysýshy memleketterdiń ulttyq ekonomıkalaryn ósirýdiń mańyzdy faktoryna aınalady. Ekonomıkalyq keńes músheleri TMD-ǵa múshe memleketterdiń ulttyq valıýtalaryn ulttyq ekonomıkalardyń ózara ekonomıkalyq is-qımylyn nyǵaıtý faktory retinde paıdalaný týraly aqparatty tyńdady.
Memleketterdiń ulttyq valıýtalaryndaǵy ózara esep aıyrysýlar taýarlar men qyzmetterdi óndirý protsesiniń barlyq kezeńderinde, sondaı-aq qurylǵan taýarlardyń aınalymy, bólý jáne aıyrbastaý satysynda olardyń ózara is-qımylynyń damýyna yqpal etedi.
Keńes sondaı-aq TMD Úkimet basshylary keńesiniń kelesi otyrysynyń qaraýyna engizý josparlanǵan birqatar qujat jobalaryn maquldady. Atap aıtqanda, ǵarysh jónindegi Memleketaralyq keńestiń 2020-2021 jyldardaǵy qyzmeti týraly esep tyńdaldy, onyń TMD-ǵa qatysýshy memleketterdiń ǵarysh keńistigin beıbit maqsatta zertteý jáne paıdalaný salasyndaǵy yntymaqtastyǵyn úılestirý jónindegi jumysynyń tıimdiligi atap ótildi.
Sondaı-aq Táýelsiz Memleketter Dostastyǵyna qatysýshy memleketterdiń 2030 jylǵa deıingi kezeńge arnalǵan aqparattyq qaýipsizdigin qamtamasyz etý strategııasyn iske asyrý jónindegi birinshi kezektegi is-sharalar josparynyń jobasy maquldandy.
Ekonomıkalyq keńes músheleri bıologııalyq materıal almasý týraly kelisim jobasyn da maquldady. Qujat TMD-ǵa qatysýshy memleketterdiń veterınarııalyq qyzmetteriniń yntymaqtastyǵyn keńeıtýdi jáne tereńdetýdi, ásirese, ınfektsııalyq aýrýlardyń oshaqtaryn erte anyqtaý jónindegi birlesken is-qımyldardy júzege asyrýdy, bıologııalyq materıalmen almasý praktıkasyn damytýdy jáne TMD-ǵa qatysýshy memleketter mıkroorganızmderiniń bıobankterin tolyqtyrýdy kózdeıdi.
1995 jylǵy 3 qarashadaǵy Táýelsiz Memleketter Dostastyǵyna qatysýshy memleketterdiń ortaq ǵylymı-tehnologııalyq keńistigin qurý týraly kelisimge ózgerister engizý týraly hattamanyń jobasy maquldandy, ony daıyndaý ǵylymdy, tehnologııalardy, ınnovatsııalardy damytýdyń qazirgi zamanǵy sharttaryna, sondaı-aq osy saladaǵy eń úzdik álemdik praktıkalarǵa sáıkes Kelisim erejelerin ózektendirý qajettiginen týyndady.
Otyrys barysynda TMD-ǵa qatysýshy memleketterdiń hımııalyq jabdyqtardy ázirleý, óndirý jáne satyp alý jónindegi ózara is-qımylyn jolǵa qoıýǵa, sondaı-aq syrtqy naryqta básekege qabilettilikti qamtamasyz etý úshin artyqshylyqtar qalyptastyrýǵa baǵyttalǵan TMD-ǵa qatysýshy memleketterdiń hımııalyq mashına jasaýdy damytý jónindegi 2030 jylǵa deıingi kezeńge arnalǵan sharalar kesheni bekitildi.
Sonymen qatar, 2017-2021 jyldardaǵy Orman ónerkásibi kesheni jáne orman sharýashylyǵy jónindegi Úkimetaralyq keńestiń qyzmeti týraly aqparat qaraldy. Sonyń ishinde transshekaralyq órtterge, zańsyz aǵash kesýge, orman zııankesteri men aýrýlaryna qarsy kúres jónindegi is-sharalardy qosa alǵanda, Dostastyq keńistigindegi orman sharýashylyǵy men orman ónerkásibin basqarýdyń memlekettik organdarynyń ózara is-qımyly týraly talqylandy. Ekonomıkalyq keńestiń sheshimimen ónim men qyzmet kórsetý sapasy salasyndaǵy jetistikteri úshin 2021 jylǵy Táýelsiz Memleketter Dostastyǵynyń syılyqtary berildi.
Ekonomıkalyq keńestiń kelesi otyrysy 2022 jylǵy 10 maýsymda Qazaqstan Respýblıkasy Nur-Sultan qalasynda ótedi dep josparlanǵan.