TMD kedenshileri 8 tonna esirtki zattaryna tosqaýyl qoıǵan

ALMATY. QazAqparat - 2017 jylǵy TMD kedenshileri 8 tonna esirtki zattarynyń jolyn kesken. Bul týraly Almatyda ótken Táýelsiz Memleketter Dostastyǵyna múshe memleketter Keden qyzmeti basshylary keńesiniń quqyq qorǵaý bólimsheleri komıtetiniń 17-shy otyrysynda aıtyldy, dep habarlaıdy QazAqparat tilshisi.

«Segiz kól» kýrorttyq parkinde  ótken sharaǵa Ázerbaıjan, Armenııa, Belarýs, Qazaqstan, Qyrǵyzstan, Reseı, Tájikstan men Ózbekstan elderiniń quqyq qorǵaý bólimshelerindegi keden qyzmetteriniń basshylary men qyzmetkerleri qatysty.

«Quqyq qorǵaý qyzmetindegi keden organdary jumysynyń mańyzy joǵary. Endi ony odan ári damytý qajet, birigip halyqaralyq yntymaqtastyq salasyndaǵy kedendik quqyq buzýshylyqtarǵa qarsy kúresý kerek»-dedi sharada sóz alǵan QR QM  Memlekettik kirister komıtetiniń tóraǵasy Ardaq Teńgebaev.

Uıymdastyrýshylardyń aıtýynsha, jıynǵa qatysýshylar TMD  elderindegi keden qyzmeti salasyndaǵy esirtkige qarsy kúres máselelerine birlesken qyzmetke basa nazar aýdarǵan.

Taratylǵan málimetterge qaraǵanda, 2017 jylǵy TMD quqyq qorǵaý bólimsheleri kedendik qyzmetinde zańsyz aınalymnan shamamen 8 tonna esirtki quraldarynyń, psıhotroptyq zattardyń jáne olardyń prekýrsorlary alyndy.

Qatysýshylar keden zańnamasynyń buzylýyn anyqtaý jáne ony toqtatý maqsatynda ózara tıimdi nátıjeli aqparat almasý  baǵyttaryndaǵy is-sharalardy uıymdastyrý týraly aıtty.

Sondaı-aq, Komıtettiń TMD  terrorızmge qarsy ortalyǵymen ózara  yntymaqtastyqty damytý máseleleri qaraldy. Qatysýshylar otyrysta qylmystyq kiristerdi joıý men terrorızmdi qarjylandyrýǵa qarsy kúresti kúsheıtýdiń mańyzyn atap ótti.

Avtory: Araılym Joldybaeva