TMD elderiniń taýar aınalymy 20,6 mlrd dollardy qurady

<p>Premer-Mınıstrdiń orynbasary Serik Jumanǵarın TMD Ekonomıkalyq keńesiniń 99 otyrysyna qatysty. Otyrysta atap ótilgendeı, Táýelsiz Elder Dostastyǵy ıntegratsııalyq baılanystardy tereńdetý jáne elderimiz arasyndaǵy kópjosparly yntymaqtastyqty qoldaý úshin tıimdi platforma retinde áreket etýdi jalǵastyryp keledi, dep habarlaıdy <a href="https://kaz.inform.kz/" target="_blank" rel="noopener">QazAqparat</a>.</p>

Negizgi baǵyttardyń biri – elderdiń saýda-ekonomıkalyq baılanystaryn kedergisiz nyǵaıtý.

Dostastyq elderiniń kólemdi ári damyp kele jatqan naryǵy, mıneraldy-shıkizat resýrstarynyń úlken qorlary, qatysýshy memleketterdiń ekonomıkalyq ózara tolyqtyrylýy, eleýli ǵylymı-tehnıkalyq áleýeti jáne kólik joldarynyń bolýy óńirdegi kópjosparly ıntegratsııa úshin qolaıly jaǵdaılardy qamtamasyz etedi.

TMD sheńberindegi tranzıttik áleýet – elderdiń ekonomıkasyna oń áser etetin jáne ony ınvestıtsııalar úshin tartymdy etetin negizgi strategııalyq resýrstardyń biri.

Dostastyq elderiniń aýmaǵyndaǵy ózara tıimdi is-qımylǵa kóbinese TMD-nyń erkin saýda kelisimin jáne qyzmetterdiń erkin saýdasy týraly kelisimdi iske asyrý yqpal etedi.

2023 jyldyń birinshi jartyjyldyǵynyń qorytyndysy boıynsha TMD elderiniń taýar aınalymy $20,6 mlrd-ty qurady, bul ótken jyldyń sáıkes kezeńimen salystyrǵanda ($19,8 mlrd) 4,4%-ǵa joǵary. 2023 jylǵy qańtar-shildede Qazaqstannan TMD elderine eksport 19,4%-ǵa ósip, $9,2 mlrd-qa jetti.

Otyrystyń qatysýshylary ekonomıkalyq ózara is-qımyldyń ózekti máseleleri boıynsha pikir almasty, ótken bes jyldaǵy TMD-nyń salalyq yntymaqtastyq organdary qyzmetiniń ekonomıka salasyndaǵy nátıjelerin qarady, 2019-2022 jyldardaǵy veterınarııa salasyndaǵy yntymaqtastyq jónindegi úkimetaralyq keńes qyzmetiniń nátıjelerin jáne basqa da máselelerdi talqylady.