TMD elderiniń kólik urlyǵyna qarsy kúres hattamasyna qandaı ózgerister engizildi
«1 sáýirde Memleket basshysy «TMD-ǵa qatysýshy memleketterdiń avtokólik quraldaryn urlaýǵa qarsy kúrestegi jáne olardy qaıtarýdy qamtamasyz etýdegi yntymaqtastyǵy týraly kelisimge ózgerister engizý týraly hattamany ratıfıkatsııalaý týraly» Zańǵa qol qoıdy. Suraý salýlardyń oryndalý nysany men merzimderin belgileý bóliginde ózgeris engizildi. Endi sharttyń árbir eli naqty ýaqyt rejıminde Aqparattyq bazalardan málimetter almasýdy júrgizýge jáne quzyretti organdardyń suraý salýy boıynsha avtokólik urlaýǵa qarsy kúreste qyzyǵýshylyq týdyratyn aqparatty jedel usynýǵa quqyly», - dedi QR ІІM resmı ókili Nurdildá Oraz onlaın brıfıngide.
Sondaı-aq, suraý salýdy oryndaý merzimi ony alǵan kúnnen bastap, bir aıdan aspaıtyn ýaqytqa belgilendi. Qajet bolǵan jaǵdaıda bul merzim qysqartylýy múmkin.
Suraý salý boıynsha aqparat berýden bas tartý úshin negizder aıqyndaldy. Suraý salý boıynsha bas tartý egemendikke, ulttyq qaýipsizdikke nuqsan keltirýi múmkin bolsa, zańdarǵa nemese halyqaralyq sharttarǵa qaıshy kelse nemese suraý salý olarǵa baılanysty emes mán-jaılar boıynsha obektıvti túrde oryndalmaıtyn jaǵdaılarda qaralǵan.
«Avtokólik quralyn qaıtarý týraly suraý salýdy oryndaýdan bas tartý negizdemeleri tizbesi qysqartyldy. Buryn mundaı negizder tórteý bolsa, endi ekeýi qaldy, atap aıtqanda, suraý salynatyn taraptyń sot sheshimi boıynsha avtokólik quraly basqa adamǵa nemese onyń ókiline berilse nemese avtokólik quralyn qaıtarýǵa kedergi keltiretin ózge de zańdy negizder bolsa ǵana qaralady», - dedi Nurdildá Oraz.
Onyń aıtýynsha, ózgerister qosymsha aqparattyq bazalardan aqparat qalyptastyrýǵa jáne almasýǵa da septigin tıgizedi. Odan bólek, talap etilmegen avtokólikti tabylǵan aýmaqtaǵy taraptyń kirisine aınaldyrý múmkindigine 1 jyl merzim belgilendi.
«Hattamada engizilgen ózgerister TMD elderinde urlanǵan avtokólikterdi qaıtarý máselelerin tıimdi sheshýge múmkindik beredi», - deıdi mınıstrlik ókili.