TMD elderiniń dıplomattary Beıjińdegi jappaı júgirýge qatysty

BEIJІŃ. QazAqparat - Búgin Beıjińde Qazaqstan Respýblıkasynyń Tuńǵysh Prezıdenti kúnine 5 jyl tolýyna oraı «Prezıdenttik mıl» halyqaralyq jeńil atletıkalyq júgirýi ótkizildi, dep habarlaıdy «QazAqparat» HAA Qytaıdaǵy menshikti tilshisi.

Atalmysh shara Beıjiń aqaparattyq tehnologııalar kolledjiniń stadıonynda ótkizildi. Oǵan Qazaqstan, Reseı, Belarýs elshilikteri men Shanhaı yntymaqtastyq uıymy (ShOS) hatshylyǵynyń ókilderi qatysty.

Shara bastalmas buryn QHR-daǵy QR elshisi Shahrat Nuryshev sóz aldy.

«Bizdiń elimizdiń jetken jetistikteri Tuńǵysh Prezıdentimiz Nursultan Nazarbaevtyń esimimen tikeleı baılanysty. Halqymyz óz prezıdentin qurmetteıdi, onyń syndarly jáne kóregen saıasatyn qoldaıdy. Tuńǵysh Prezıdent kúni - bizdegi Parlament depýtattarynyń bastamasymen bekitildi. Biz búgin alǵashqy júgirýdi ótkizemiz jáne sizderdiń qoldaýlaryńyzben jyl saıyn ótkiziledi dep senemiz», - dedi elshi.

2 400 metr qashyqtyqtan birinshi bolyp qazaqstandyq dıplomat Sanand Álibaevtyń 14 jastaǵy uly keldi, ekinshi - Qazaqstan elshiliginiń úshinshi hatshysy Dáýren Rahmetov, úshinshi bolyp Belarýs elshiliginiń attashesi Ilıa Jelýdov máre syzyǵynan ótti.

Beıjiń aqparattyq tehnologııalar kolledjiniń halyqaralyq yntymaqtastyq jónindegi basqarmasynyń basshysy Tszıa Tsınshýı qazaqstandyqtardy QR Tuńǵysh Prezıdenti kúnimen quttyqtap, aldaǵy ýaqyttaǵy Qazaqstan men Qytaı arasyndaǵy strategııalyq yntymaqtastyqtyń nyǵaıýyna senim bildirdi.

«Bizdiń elderimiz arasyndaǵy strategııalyq baılanys ásirese «Bir beldeý, bir jol» baǵdarlamasy aıasynda  jyl ótken saıyn nyǵaıyp keledi.  Mádenı-gýmanıtarlyq baǵyttaǵy, sondaı-aq QHR men QR arasyndaǵy bilim salasyndaǵy ózara árekettestiktiń tereńdep kele jatqanyn atap ótkim keledi. Bizdiń kolledjimizde qazaqstandyq stýdentter bilim alady. QHR tóraǵasy Sı Tszınpın men Qazaqstan Prezıdenti Nursultan Nazarbaev arasyndaǵy dostyq baılanys úlken mańyzǵa ıe», - dedi ol.