TMD elderinde ónerkásip óndirisiniń kólemi qysqardy
21:41, 12 Sáýir 2016
ASTANA. QazAqparat - Táýelsiz Memleketter Dostastyǵy Statıstıka komıtetiniń derekteri boıynsha dostastyq elderinde 2016 jylǵy qańtar-aqpanda 2015 jylǵy qańtar-aqpanmen salystyrǵanda ónerkásip óndirisiniń kólemi 0,7% qysqardy. Bul týraly QR Ulttyq ekonomıka mınıstrligi Statıstıka komıtetiniń baspasóz qyzmetinen habarlandy.
«Atap aıtqanda, Dostastyq elderinde tutyný baǵalary 2016 jylǵy aqpanda 2015 jylǵy jeltoqsanmen salystyrǵanda 1,7 paıyzǵa artty. Al ónerkásip taýarlaryn óndirýshiler baǵalary 2,1 paıyzǵa qysqardy», - delingen baspasóz baıanynda.
Tutastaı alǵanda, 2016 jyldyń qańtar-aqpanynda TMD boıynsha barlyǵy byltyrǵy jyldyń osy kezeńimen salystyrǵanda jalpy ishki ónim 97,12 paıyzdy quraǵan. Al esepti kezeńde ónerkásip 99,3 paıyz, qubyr kóliginsiz júk tasymaldaý 98,4 paıyzǵa teń boldy. Budan bólek, bólshek saýda aınalymy TMD elderinde 94,9 paıyzdy qurasa, ónerkásip taýarlaryn óndirýshiler baǵalarynyń ındeksi 97,9 paıyzǵa teń boldy.