TMD elderi qarýly kúshteriniń bas shtab basshylary Bakýde kezdesedi

BAKÝ. QazAqparat – 12 qazanda Bakýde Táýelsiz memleketter dostastyǵyna (TMD) múshe elder Qarýly kúshteriniń shtabtar bastyǵy komıtetiniń kezekti otyrys ótedi. Bul týraly «QazAqparat» HAA menshikti tilshisi Ázerbaıjan Qorǵanys mınıstrliginiń málimetine silteme jasap habarlaıdy.

Otyrysqa Qazaqstan, Belarýs, Qyrǵyzstan, Ózbekstan qarýly kúshteri bas shtabtarynyń bastyqtary, Reseı qarýly kúshteri bas shtaby bastyǵynyń orynbasary, Reseı Federatsııasyndaǵy Tájikstannyń áskerı attashesi qatysady.

Tóraǵalyq etýshi – Ázerbaıjan qorǵanys mınıstriniń birinshi orynbasary – ázerbaıjan armııasy bas shtabynyń bastyǵy general-polkovnık Kerım Velıev.

Buǵan deıin Qyrǵyzstannyń qorǵanys mınıstrligi óz eliniń áskerı kontıngenti Ujymdyq qaýipsizdik týraly shart uıymynyń (UQShU) Tájikstanda ótetin «Rýbej-2022» oqý-jattyǵýyna qatyspaıtynyn málimdegen bolatyn. Onymen qosa, Qyrǵyzstan óz aýmaǵynda UQShU bitimgerlik kontıngentiniń «Myzǵymas baýyrlastyq – 2022» komandalyq-shtabtyq oqý-jattyǵýyn ótkizýden bas tartty. Oqý-jattyǵý 10-14 qazan kúnderine josparlanǵan bolatyn.