TMD elderi izdestirip júrgen qylmyskerler Almaty oblysynda ustaldy

TALDYQORǴAN.QazAqparat - Almaty oblysynyń polıtseıleri eki kún ishinde otyzǵa jýyq kúdiktini qolǵa túsirdi. Onyń 8-i - Reseı, Ázerbaıjan, Ózbekstan jáne Bashqurt elderinde halyqaralyq izdeý jarııalaǵan kánigi qylmyskerler, dep habarlaıdy QazAqparat tilshisi.

«Oblysymyzda «Іzdestirý» jedel aldyn alý is-sharasy jalǵasýda. Іs-shara barysynda polıtseıler qylmystyq jaýapkershilikten jaltarǵan 28 adamdy ustady. Іz-túzsiz joǵalǵan segiz adamnyń mekenjaıy anyqtalyp, buǵan deıin jasalǵan 19 qylmys ashyldy. Sondaı-aq, osy kezge deıin aty-jóni belgisiz 3 máıittiń jeke málimetteri anyqtaldy», - dep málimdedi Almaty oblysy polıtsııa departamentiniń baspasóz qyzmetinen.

Vedomstvo taratqan aqparatqa sáıkes, kórshi elde qylmys jasady degen kúdikpen izdeý jarııalanǵan 8 adam qolǵa tústi.

«Qarasaı aýdanynda Ózbekstan Respýblıkasy memleketaralyq izdeý jarııalaǵan tórt azamat ustaldy. Talǵar jáne Іle aýdandarynda reseılik áriptesterimiz izdep jatqan eki tulǵa quryqtaldy. Talǵarda Bashqurt eli izdeý jarııalaǵan bir adamnyń mekenjaıy anyqtalsa, Tekelide Ázerbaıjan memleketinde qylmys jasap, boı tasalaǵan 33 jastaǵy er adam ustalyp, qamaýǵa alyndy», - dep atap ótti vedomstvo ókilderi.

Qazir ustalǵandar týraly aqparat QR Іshki ister mınıstrligine jáne izdeý jarııalaǵan sheteldik áriptesterge joldanǵan.