TMD Ekonomıkalyq Sotynyń shyǵyndary azaıtylady - Senat

ASTANA. QazAqparat - QR Parlamenti Senatynyń jalpy otyrysynda  «1992 jylǵy 6 shildedegi Táýelsiz Memleketter Dostastyǵy  Ekonomıkalyq Sotynyń mártebesi týraly kelisimge ózgerister engizý týraly hattamany ratıfıkatsııalaý týraly» Zańy qabyldandy, dep habarlaıdy QazAqparat tilshisi.

«Hattama kelisimge jáne bul organ týraly erejege túzetýler engizýdi qarastyrady. Ol TMD Sotynyń az júktemesine baılanysty ony reformalaýǵa baǵyttalǵan. Hattamanyń túbegeıli jańashyldyǵy - TMD Sotyn «ad hoc» qaǵıdasy boıynsha jańa jumys formatyna aýystyrý. Hattama boıynsha qatysýshy memleketter sýdıalardy ózderi anyqtaıdy jáne olardyń derekterin TMD Sotynyń biryńǵaı tizilimine qosý úshin Táýelsiz Memleketter Dostastyǵy  Sotyna joldaıdy. Naqty isterdi qaraý úshin arnaıy úsh sýdıadan turatyn palata qurylady», - dedi zań jobasy boıynsha baıandama jasaǵan Ádilet mınıstri Marat Beketaev.

Onyń sózine qaraǵanda, sýdıalar Mınskige aýyzsha tyńdaýlar kezeńine ǵana keledi. Bul atalǵan organnyń shyǵystaryn óteý úshin respýblıkalyq bıýdjet shyǵyndaryn aıtarlyqtaı qysqartýǵa múmkindik beredi.

«2015 jyly Qazaqstan 51 mln teńge tólese, osy jyly jańa formatqa baılanysty 8,5 mln teńge josparlanyp otyr.  Jalpy alǵanda, hattamany ratıfıkatsııalaý TMD quqyqtyq bazasyn odan ary qaraı jetildirýge baǵyttalǵan», - dep atap ótti mınıstr.

Budan buryn habarlanǵandaı, sýdıalardy belgilengen kvota aıasynda qatysýshy memleketter jekeleı taǵaıyndaıdy jáne árbir taraptan eki sýdıadan irikteledi. Qazaqstandyq kandıdatýralardy Memleket basshysynyń kelisimi boıynsha Joǵarǵy Sot anyqtaıdy jáne 2017 jyly  qańtarda Qazaqstan Respýblıkasy eki kandıdatýra joldady. Jańa «ad hoc» formaty TMD sotynyń sýdıalaryna turaqty túrde jalaqy tólemeýge múmkindik beredi. Sol sebepten TMD sotynyń bıýdjeti azaıady, onyń ishinde Qazaqstannyń da úlesi tómendeıdi.