TMD-dan kelgen eńbek mıgranttary salyq tóleıtin bolady

ASTANA. 8 qańtar. QazAqparat - TMD elderinen kelgen eńbek mıgranttary úshin jańa erejeler engizildi. Búgin kóshi-qon úderisterin memlekettik retteýdi jetildirýge qatysty ózgerister men tolyqtyrýlar týraly Astana qalasy ІІD Kóshi-qon polıtsııasy basqarmasynyń bastyǵy Gúlvıra Dónenbaeva áńgimelep berdi.

Onyń aıtýynsha, shetelden jumysshylardy tartý jónindegi jeńildetilgen ruqsatnamany tek jeke tulǵalar ǵana qoldana alady.

«Ońaılatylǵan tártip boıynsha shetel azamattary jeke tulǵalarda ǵana jumys isteı alady. Bir azamat óziniń úı sharýashylyǵyna besten kóp emes eńbek mıgranttaryn shaqyrtýǵa quqyǵy bar. Kásipkerlerge bul tártip qoldanylmaıdy», - dep atap ótti ol.

Ruqsat berilgen árbir aıǵa jeke tabys salyǵy boıynsha 2 aılyq eseptik kórsetkish, ıaǵnı 3704 teńge kóleminde aldyn ala tólem jasalýy tıis. Ruqsat 1 aıdan 3 aıǵa deıin merzimge beriledi.

«Eńbek mıgranttarynyń jalpy kelý merzimi bir jyldan aspaýy kerek. Odan kóp merzimge ruqsat berý uzartylmaıdy. Shetel azamaty Qazaqstannan shyǵýy tıis, sonan soń jańa ruqsat berý ótken merzimnen bir aıdan soń ǵana rásimdeledi», - dedi G.Dónenbaeva.

Ákimshilik quqyq buzýshylyq Kodeksinde jeke tulǵalarǵa sáıkes ruqsatynsyz eńbek mıgranttaryn tartqany, sonymen qatar úı sharýashylyǵyn atqarýǵa besten kóp eńbek mıgranttarymen eńbek kelisimsharttaryn jasaǵany úshin jaýapkershilik qarastyrylǵan. Alǵashqy ret osyndaı quqyq buzýshylyq úshin kináliler 30 aılyq jalaqylyq kórsetkish kóleminde (55 560 teńge), qaıtalanǵan jaǵdaıda - 50 AJK (92 600 teńge) aıyppul tóleıdi.