TMD boıynsha eń arzan alkogol Qazaqstanda

NUR-SULTAN. QazAqparat – Elimizde alkogoldi ishimdik baǵasy bir aıdyń ishinde 3%-ǵa, al bir jylda 12%-ǵa ósti. Sondaı-aq bıyl qańtar-sáýir aılarynda Qazaqstanda araq jáne konıak óndirisi artqan, dep habarlaıdy QazAqparat Energyprom resýrsyna silteme jasap.

Elimizde júzim sharabyn jasaý azaıǵan (35,1% tómendep 8,8 mln lıtrge azaıyp otyr).

Onyń ishinde shymyrlaıtyn sharap óndirisi de (óndiris birden 70,3% kemigen, bar bolǵany 267,2 myń lıtr) tómendegen.

Sonymen qatar lıker (9,2%-ǵa, 679,7 myń lıtrge deıin) jáne syra (3,5%-ǵa, 208,7 mln lıtrge deıin) shyǵarý azaıdy.

Bıylǵy jyldyń birinshi toqsanynyń qorytyndysy boıynsha jergilikti kompanııalar syraǵa suranysty (eksport pen ishki naryqty qosa alǵanda) 90,7% qamtamasyz etti.

Bir jyl buryn bul kórsetkish 92,9%-dy quraǵan. Import kólemi jyl boıy 39,4%-ǵa artyp, 16,4 mln lıtrge deıin ósti.

Al jergilikti óndiristiń naryqty araq jáne lıker-araq buıymdarymen qamtamasyz etýi 83,5% jetti.

Bir jyl buryn 75,7% bolǵan. Degenmen ımporttyń jyl boıy 0,7%-ǵa, ıaǵnı 2,4 mln lıtrge deıin azaıǵany baıqaldy.

Habarlamada aıtylǵandaı, elimizde sharapqa suranys 64,2%-ǵa qamtamasyz etildi. Importtyń úlesi - 35,8%.

Elge 2,8 mln lıtr sharap ákelindi, bul bir jyl burynǵyǵa qaraǵanda 34,7%-ǵa artyq.

Qazaqstanda bıyl sáýir aıynyń qorytyndysy boıynsha alkogol sýsyndarynyń baǵasy bir aıda 2,6%-ǵa, jyl basynan beri 6,8%-ǵa al bir jyldyń ishinde 11,7%-ǵa ósti.

Aı saıynǵy dınamıka boıynsha bir aıda araqtyń baǵasy - 2,4%, sharap pen syra - 2,6%-ǵa qymbattady.

Jyldyq dınamıkaǵa kelsek, sharaptyń baǵasy - 9,5%, araq - 10,2% jáne syra 15,4%-ǵa ósti.

TMD elderi arasynda Qazaqstanda alkogol baǵasy joǵary emes.

Mysaly, Numbeo.com málimeti boıynsha Qazaqstanda orta klasty bir bótelke sharap 5,76 AQSh dollaryn quraıdy.

0,33 lıtrlik bótelkede satylatyn ımporttalǵan syranyń baǵasy - 1,39 dollar.

Al jergilikti syra 0,5 lıtrlik bótelke úshin - 0,72 dollar (eń tómengi baǵa).

Eń qymbat bir bótelke sharap Reseıde (9,67 AQSh dollary), sondaı-aq ımporttalǵan syra da (2,16 AQSh dollary) qymbat munda.

Jergilikti sharap eń qymbat el - Ázerbaıjan. Bir qutysy 1,15 dollar turady.