TMD baıqaýshylar mıssııasy shtaby jumysyna kiristi

ASTANA. QazAqparat - TMD baıqaýshylar mıssııasy shtaby kezekten tys prezıdenttik saılaýdy baıqaý jumysyna kiristi. Bul týraly búgin QR Ortalyq saılaý komıssııasynyń tóraǵasy Qýandyq Turǵanqulovpen kezdesken atalǵan shtabtyń jetekshisi Evgenıı Sloboda aıtty.

Aıta keterligi, kezdesý barysynda Q.Turǵanqulov E.Slobodany Qazaqstan Respýblıkasy Prezıdentiniń kezekten tys saılaýyn ázirleý jáne ótkizý jónindegi jumyspen tanystyrdy. Óz kezeginde TMD baıqaýshylary mıssııasy shtabynyń jetekshisi saılaýdy baıqaýǵa qatysýǵa shaqyrý úshin rızashylyǵyn bildirip, TMD keńistigi men odan tysqary saılaýdy baıqaýda qomaqty tájirıbesi bar mıssııa baıqaýshylarynyń kópshiligi ádildik jáne alalamaýshylyq qaǵıdattaryn buryn da basshylyqqa alǵanyn, qazir de basshylyqqa alatynyn atap ótti. «TMD-dan mıssııa shtaby jumysqa kiristi. Biz ózimizdiń ókilderimizdi respýblıkanyń barlyq óńirlerine jiberýge nıettimiz. Bizdiń josparymyzda saılaýǵa qatysýshy kandıdattardyń ókilderimen kezdesýler ótkizý bar. Bizdiń barlyq is-sharalarymyz baspasóz habarlamalarynda kórsetiletin bolady. Mıssııanyń negizgi mindeti - demokratııalyq saılaýdy ótkizýge járdemdesý jáne biz halyqaralyq baıqaýdyń jalpyǵa tanymal normalarynyń aıasynda jumys jasaýǵa nıettimiz», - dedi ol. Kezdesý sońynda QR OSK tóraǵasy Q.Turǵanqqulov TMD baıqaýshylary mıssııasy shtabynyń jetekshisine onyń 2015 jylǵy 26 sáýirge belgilengen QR Prezıdentiniń saılaýyn halyqaralyq baıqaýshy retinde akkredıttelgeni týraly kýálik tapsyrdy.