TMD áýe kemelerin basyp alý sekildi áreketterge qarsy birlese kúresedi - Májilis

ASTANA. 25 jeltoqsan. QazAqparat - Búgin QR Parlament Májilisiniń jalpy otyrysynda palata depýtattary «TMD qatysýshy memleketter kúshteriniń áýe shabýylyna qarsy qorǵanys jónindegi kezekshileriniń áýe kemesin basyp alý týraly aqparatty alǵan kezdegi is-qımyldaryn uıymdastyrý týraly kelisimdi ratıfıkatsııalaý týraly» zań jobasyn maquldady.

QR Qorǵanys mınıstriniń orynbasary Oqas Saparovtyń aıtýynsha, kelisim 2011 jyldyń úshinshi qyrkúıeginde jasalǵan. Qujattyń maqsaty TMD qatysýshy memleketter kúshteriniń áýe kemesin basyp alý men áketý barysynda qarsy qoldanylatyn sharalar kelisimin aıqyndaý bolyp tabylady. Sonymen qatar, kelisim aıasynda áýe keńistiginiń qaýipsiz paıdalanylýyn qamtamasyz etý, terrorızmge qarsy turý sharalaryn qoldaný qarastyrylady.

Óz sózinde Halyqaralyq ister, qorǵanys jáne qaýipsizdik komıtetiniń múshesi Abaı Tasbolatov taraptardyń yntymaqtastyǵy osy Kelisimniń ajyramas bóligi bolyp tabylatyn kezekshilerdiń is-qımyldarynyń tártibi týraly erejege sáıkes júzege asyrylatyndyǵyn túsindirdi.

TMD-ǵa qatysýshy memleketter Qorǵanys mınıstrleriniń keńesi janyndaǵy Áýe shabýylyna qarsy qorǵanys máseleleri jónindegi úılestirý komıteti TMD-ǵa qatysýshy memleketter áýe shabýylyna qarsy qorǵanys birikken júıesi kúshteriniń is-qımyldary boıynsha birlesken jattyǵýlaryn jyl saıyn ázirleıdi jáne ótkizedi.