TMD atqarýshy hatshysynyń laýazymy ózgeretin boldy

ASTANA. QazAqparat – TMD memleketteri basshylary keńesi sammıtiniń shaǵyn otyrysynda TMD atqarýshy hatshysynyń laýazymyn TMD bas hatshysy etip ózgertý týraly sheshim qabyldandy. Bul jaıynda QR Prezıdenti Qasym-Jomart Toqaev samıtttiń keńeıtilgen otyrysynda aıtty, dep habarlaıdy QazAqparat tilshisi.

«Men qol qoıý rásimi ótip jatqan kezde sizderge shaǵyn formatta TMD atqarýshy hatshysynyń laýazymyn TMD bas hatshysy dep qaıta ataý týraly talqylaǵanymyzdy málim ete keteıin», - degen Qazaqstan basshysy buǵan deıin AÓSShK men Shanhaı yntamqtastyq uıymy atqarýshy hatshylarynyń laýazymy da ózgertilgenin eske saldy.

«Osy másele boıynsha sóılegen sózimde men osyndaı usynys aıttym. Óıtkeni keshe biz AÓSShK atqarýshy hatshysynyń laýazymyn bas hatshy laýazymyna qaıta ataý týraly sheshim qabyldadyq. Budan buryn ShYU atqarýshy hatshysynyń laýazymy da bas hatshy laýazymy bolyp ózgertildi. Negizi atqarýshy organ laýazymynyń mártebesin arttyrý máselesi mańyzdy. Onyń ústine Sergeı Nıkolaevıch Lebedev týraly aıtylyp otyrǵandyqtan, ol adam TMD-nyń Bas hatshysy sııaqty laýazymyna ábden laıyq dep oılaımyn. Bas hatshy laýazymynyń ózi belgili bir dárejede, jalpy uıymymyzdyń mártebesin edáýir arttyratyny anyq»,- dedi Qasym-Jomart Toqaev.