Tili jutań, óz oıyn ashyq jetkize almaıtyn balalardyń kóptigi kitap oqymaǵandyqtyń saldary – kitaphanashy

<p>Byltyrdan bastap 24 qazan elimizde Kitaphanashy kúni bolyp bekitildi. Rýhanııat oshaǵynda mańdaı terin tógip júrgen bul mamandyq ıeleri kóp jaǵdaıda kóleńkede qalyp qoıyp jatady. Al óskeleń urpaqty otansúıgishtikke tárbıelep, kitap oqýǵa baýlıtyn olardyń eńbekteri ushan-teńiz.</p>

Osynaý merekege oraı Kazinform agenttiginiń tilshisi Óskemendegi O.Bókeı atyndaǵy qalalyq kitaphanada jemisti jumys istep júrgen jas kitaphanashy Tańnur Bashaıdy áńgimege tartyp kórgen edi.

- Qazir kitaphanashy mamandyǵyna bet buratyn jastar az sekildi. Álde men qatelesemin be ? Jalpy ózińiz osy mamandyq ıesi atanǵanyńyzǵa qansha ýaqyt boldy ?

- Meniń negizgi mamandyǵym – jýrnalıst. 2019 jyly S.Amanjolov atyndaǵy Shyǵys Qazaqstan ýnıversıtetin «Jýrnalıstıka» mamandyǵyna boıynsha támamdadym. Sonda 4-kýrs oqyp júrgende dıplomdyq jumysymdy jazý úshin talaı kitaphanaǵa baryp kórgen edim. Onyń ishinde O.Bókeı atyndaǵy qalalyq kitaphana ózim úshin óte jaıly, yńǵaıly boldy. Sebebi onda kelýshiler úshin barlyq múmkindik jasalǵan eken. Dıplomdyq jumysymdy aıaqtaǵanǵa deıin kitaphanany ǵana emes, kitaphanashy mamandyǵynyń da qyr-syryn bilip qaldym. Sóıtip qyzyǵýshylyǵym artyp, osynda jumysqa turýdy uıǵardym.

Negizinen mektep kezinde de kitapqa jaqyn boldym. Qazaqtyń klassık jazýshylarynyń týyndylaryn oqyǵandy jaqsy kóretinmin. Onyń ishinde súıikti shyǵarmalarym – Júsipbek Aımaýytovtyń «Aqbilegi», Ǵabıt Músirepovtyń «Ulpany», Sábıt Muqanovtyń «Botakózi», Ázilhan Nurshaıyqovtyń «Mahabbat qyzyq mol jyldary».

Iá, qazir kitaphanaǵa jumysqa keletin jastar az. Sebebi kóbisi kitaphanany áli de kitap beretin jer retinde ǵana elestetedi. Biraq shyndyǵyna kelgende munda tirshilik qyj-qyj qaınap jatyr. Eger muǵalim nemese jýrnalıst mamandyǵyn bitirseń, bul saǵan úlken ómirge qadam basar aldyndaǵy taǵylymy mol mektep ekenine kózim anyq jetti.

Foto: keıipkerdiń jeke arhıvinen

- Qazirgi zamandaǵy kitaphana qandaı bolýy kerek ?

- Kitaphana oqyrman úshin túgel múmkindikti jasap berýi tıis. ıAǵnı, osynda kelgen adam kúıbeń tirshiliktiń taýsylmaıtyn túıtkilderin bir sátke umytyp, taza bilimge, ǵylymǵa bet qoıa alýy qajet. Ol úshin rýhanııat oshaǵynda qajetti kitaptar, basylymdar, zamanaýı tehnologııalar bolýy kerek. Máselen, bizdiń kitaphanada mýltfılm jasaıtyn mýltstýdııa, adamdy tsıfrly álemge aparatyn VR-kózildirik bar, birneshe tildi úıretetin tegin kýrstar, túrli úıirmeler jumys istep tur. Onyń bári tegin. Keıde «Biz mektepte oqyp júrgende osyndaı múmkindikterdiń bolmaǵanyn qarashy» dep qynjylasyń.

- O.Bókeı kitaphanasynyń basqa kitaphanalardan aıyrmashylyǵy men artyqshylyqtary qandaı ?

- Bul suraqqa men osy kitaphananyń qyzmetkeri emes, oqyrman retinde jaýap bergim keledi. Kitaphana búgingi jastar táýeldi bolǵan tehnologııalardy olardyń ıgiligi úshin paıdalanýda. Balalardy oınatyp júrip kitap oqýǵa baýlýǵa, ulttyq salt-dástúrimizdi dáripteýge tyrysýda. Kitaphana dırektory Habıba Myrzahanqyzynyń «Árbir oqyrmandy qudalaryń kelgendeı qarsy alyńdar» degeni bar. Rýhanııat oshaǵynyń basty ustanymy osy.

- Búgingi jastar kitap oqı ma ?

- Kópke topyraq shashýdan aýlaqpyn. Kitap oqıtyn jastar bar. Jańa kitaptardy tosyp, ózin qyzyqtyrǵan taqyryptaǵy týyndylardy asyǵa qolǵa alatyndardy talaı baıqap júrmiz. Olardy kórip qýanasyń. Biraq kitaptyń betin de ashpaıtyndar barshylyq. Tili jutań, óz oıyn ashyq jetkize almaıtyn balalardyń kóptigi osy kitap oqymaǵandyqtyń saldary dep oılaımyn.

- Jastardy kitap oqýǵa baýlý úshin ne isteýimiz kerek ?

- Olarǵa kóp kitap oqyǵan adamnyń qandaı bolatynyn kórsetýimiz qajet. Kimniń til baılyǵy mol, ár sózi ornyna qaǵylǵan shegedeı, ozyq oıly jan bolǵysy kelmeıdi deısiń? Biraq sol úshin kitappen dos bolyp, mol eńbektený kerek.

- Kitaphanashy kúniniń mańyzdylyǵy nede, bul merekeni qalaı atap ótken jón dep oılaısyz ?

- Bul merekeniń mańyzy zor. Kitaphana – rýhanı ortalyq, al kitaphanashy – oqyrman men kitap arasyndaǵy altyn kópir. Jastarymyz altyn ýaqytyn telefonǵa telmirip ótkizbese eken dep damyl kórmeı eńbektenip júrgen bul mamandyq ıelerine laıyqty qurmet kórsetilse eken deımiz. Memleket tarapynan kitaphana isine kóbirek kóńil bólinse degen tilegimiz bar. Bul merekede tek kitaphanashylar bir-birin quttyqtap otyrmaı, respýblıkalyq deńgeıdegi sharalar ótkizilse nur ústine nur bolar edi. Osy salada talaı jyl ter tókken jandar marapattalsa jastarǵa da shabyt berip, jumysqa degen yntalaryn arttyrar edi.

 

- Áńgimeńizge kóp rahmet!