Tili kesh shyqqan balalardyń ata-analary Astanada arnaıy ortalyqqa júgine alady

<p>ASTANA. KAZINFORM — Astanada pılottyq rejımde damýynda buzylý qaýpi bar nemese damýynda erekshelikteri bar balalardy tárbıelep otyrǵan otbasylardy erte qoldaý qyzmeti iske qosyldy. Bul týraly elorda ákimdiginiń resmı saıty habarlady.</p>

0 jastan 3 jasqa deıingi balalary bar otbasylar qyzmet mamandaryna jazyla alady. Atalǵan mekemede ata-analardy oqytýǵa basa nazar aýdarylady. Erte qoldaý qyzmetin «Múmkindikter ýaqyty» jobasy aıasynda «Dara» qory ashty.

— Eger bala qatarlastaryna qaraǵanda motorıkany baıaý meńgerse, tili kesh shyqsa, agressııa kórsetse nemese únemi jylasa, sondaı-aq uıqysy men tábeti buzylǵan bolsa, ata-analarǵa erte qoldaý qyzmetine júginý qajet bolady. Eger ata-anany birnárseni alańdatsa jáne olar balasynyń damý erekshelikterin jaqsy túsingisi kelse, olarǵa qyzmet mamandary kómektesedi. Erte qoldaý — bul ata-analar men balalarǵa keshendi kómek, — delingen habarlamada.

Qyzmet kórsetý mamandary ata-analarǵa balasyn ómiriniń alǵashqy kezeńderinde fýnktsıonaldy túrde damytýǵa úıretedi. Olar qaı baǵytta qıyndyqtar bolǵanyna baılanysty qyzmetterdi tańdaıdy. Bul qorshaǵan ortany bilý, qarym-qatynas jasaý, eńbekteý nemese serýendeý daǵdylary, sondaı-aq tamaqtaný, qol jýý jáne t. b. sııaqty daǵdylary bolýy múmkin.

Erte qoldaý qyzmeti elordanyń eki psıhologııalyq-pedagogıkalyq túzetý kabınetiniń bazasynda ashyldy. Otbasylardy keshendi qoldaý úshin úsh oryn uıymdastyrylǵan: damytý aımaǵy — balalar úshin, keńes berý aımaǵy — ata-analar úshin jáne jumys aımaǵy — maman úshin. Otbasylarǵa barlyq kómek tegin kórsetiledi.

Astana qalasynyń № 1 jáne № 2 túzetý kabınetteriniń málimetteri boıynsha qazir elordada 200-den astam otbasy erte qoldaý mamandarynyń kómegine muqtaj.

— Balalarmen jumys isteýdiń basqa baǵdarlamalarynan aıyrmashylyǵy, munda qyzmet mamandarynyń keshendi tásili basty ról atqarady: olar tek balamen ǵana emes, búkil otbasymen de jumys isteıdi. Balalar kásibı mamandardan derbes ómir súrý erejelerin úırenedi, al ata-analar balalarmen ózara is-qımyl daǵdylaryn ıgerýge múmkindik alady, — dep atap ótti Astana qalasy bilim basqarmasynyń bas mamany Gúlshat Isınova.

Erte qoldaý qyzmeti otbasylardy myna mekenjaılar boıynsha qabyldaıdy:

* № 1 psıhologııalyq-pedagogıkalyq túzetý kabıneti: Astana qalasy, Máńgilik El dańǵyly, 22/1, tel. [phone];

* № 2 psıhologııalyq-pedagogıkalyq túzetý kabıneti: Astana qalasy, Sh. Aıtmatov k-si, 41a, 1 blok, tel. [phone].

Aıta keteıik, jaqynda Jetisý oblysynda erekshe balalarǵa arnalǵan tuńǵysh ıppoterapııa ortalyǵy ashylǵany belgili boldy.