Mınıstrlik tikushaq apatynan qaza tapqan ofıtserdiń aty-jónin atady
— Aqtóbe oblysyndaǵy oqý-jattyǵý ushýy kezinde bolǵan avıatsııalyq apat saldarynan 1988 jyly týǵan Áýe qorǵanysy kúshteri áskerı ınstıtýty avıatsııalyq eskadrılıasynyń ofıtser-nusqaýshysy maıor Batyr Qaıratuly Orazymbetov qaıǵyly jaǵdaıda qaza tapty, — delingen habarlamada.
Ofıtser Áýe qorǵanysy kúshteri áskerı ınstıtýtyn 2009 jyly «ushaqtar, tikushaqtar jáne avıatsııalyq qozǵaltqyshtar» mamandyǵy boıynsha bitirgen. Qyzmet barysynda Áýe qorǵanysy kúshterinde túrli laýazymdardan ótken. Mı-8 tikushaǵyn paıdalanýda úlken tájirıbesi bar, jalpy ushý ýaqyty 500 saǵattan asady. Qyzmet barysynda joǵary kásibılik pen adaldyq tanytqan. Bıylǵy jyldyń kókteminde bolǵan sý tasqynyna qarsy is-sharalarǵa qatysqan. Mereıtoılyq jáne eńbek sińirgen jyldary úshin medaldarymen marapattalǵan. Úılengen, artynda eki balasy qaldy.
— Apatty jaǵdaıdaǵy qoný kezinde zardap shekken áskerı ınstıtýt avıatsııalyq eskadrılıasynyń komandıri maıor Bıbarys Ibraev pen oqý-jattyǵý avıatsııalyq ortalyǵynyń aǵa ushqysh-nusqaýshysy aǵa leıtenant Rústem Nyǵmetov qazir oblystyq aýrýhanada jatyr. Jaǵdaılary turaqty aýyr. Olarǵa barlyq qajetti medıtsınalyq kómek kórsetilýde, — dep qosty vedomstvo baspasóz qyzmeti.
Qaza tapqan ofıtser men zardap shekkenderdiń týystary men jaqyndaryna jan-jaqty qoldaý kórsetilý ústinde.
Eske salsaq, búgin Mártók aýdany Saryjar aýylynda tikushaq apatqa ushyryp, janyp ketti.
Bortta úsh adam bolǵan. Onyń bireýi oqıǵa ornynda kóz jumdy.
Eki naýqasty kúıik shalǵan. Olar Aqtóbe oblystyq kópsalaly aýrýhanada em qabyldap jatyr. Ázirge naýqastardyń aty-jóni belgisiz.
Buǵan deıin Qorǵanys mınıstrligi resmı habarlama jasap, tikushaq apatynyń aldyn ala sebebin aıtqan bolatyn.
Sonymen qatar, tikushaq apatyna baılanysty qylmystyq is qozǵaldy. Qazir tergeý júrip jatyr.
Budan bólek, Aqtóbe oblysynyń ákimdigi tikushaq apatynan zardap shekkenderge kómek kórsetetinin málim etti.