«TKSh-ny jańǵyrtý» baǵdarlamasy boıynsha 398 úıdiń jóndeý jumystary aıaqtaldy

ASTANA. 21 sáýir. QazAqparat - «Turǵyn úı-kommýnaldyq sharýashylyqty jańǵyrtý» baǵdarlamasy boıynsha jóndeý jumystary josparlanǵan úılerdiń jalpy sany - 565, onyń ishinde І tetik boıynsha - 106 úıde, ІІ tetik boıynsha - 459 úıde jóndeý jumystary júrgizilmek,

dep habarlady pm.kz saıtyna QR Statıstıka agenttiginiń baspasóz qyzmeti.

Vedomstvonyń baspasóz qyzmeti habarlaǵandaı, baǵdarlamanyń І tetigi boıynsha jóndeý jumystary josparlanǵan barlyq úıler kondomınıým retinde tirkeldi. 105 úı jobalaý-smetalyq qujattaryna jáne Memlekettik saraptama qorytyndylaryna ıe.

Respýblıka boıynsha bul tetikke bólingen 5,5 mlrd. teńgeniń 4,6 mlrd. teńgesi nemese 85 paıyzy ıgerilip boldy. 

«Baǵdarlamanyń ІІ tetigi boıynsha 459 úıde jóndeý jumystary josparlanǵan. Onyń ishinde 456 úı jobalaý-smetalyq qujattarymen qosa Memlekettik saraptama qorytyndylaryna ıe», - delingen habarlamada.

2012 jyldyń 26 naýryzyndaǵy jaǵdaı boıynsha, Aqmola, Aqtóbe, Almaty, Atyraý, Jambyl oblystarynda 333 úıde jóndeý jumystary aıaqtaldy.