TKSh-ǵa tartylǵan ınvestıtsııanyń 98 paıyzy bıýdjetten tys kózderden tústi

NUR-SULTAN. QazAqparat - 2015 jyldan beri shekti tarıfter arqasynda turǵyn úı-kommýnaldyq sharýashylyq ınfraqurylymynyń tozýy deńgeıin tómendetýge múmkin boldy. Bul týraly Parlament Senaty Ekonomıkalyq saıasat, ınnovatsııalyq damý jáne kásipkerlik komıteti múshelerimen kezdesý barysynda QR Ulttyq ekonomıka vıtse-mınıstri Serik Jumanǵarın málim etti, habarlaıdy QazAqparat tilshisi.

Vıtse-mınıstr 2015 jyly uzaqmerzimdi shekti tarıf saıasaty usynylǵanyn eske saldy. Bul óz kezeginde ınvestorlarǵa TKSh salasyndaǵy ınvestorlarǵa qajetti ınvestıtsııanyń keńistigin aıqyndaýǵa, kásipkerlerge óz qyzmetinde tarıfterge shyǵyndaryn boljaýǵa jáne ınfraqurylymnyń tozýyn toqtatýǵa múmkindik berdi.

Atap aıtqanda, 2021 jylǵa deıin tabıǵı monopolııalar salasyna 2,2 trln teńge ınvestıtsııany tartý josparlanǵan edi, onyń ishinde 1,3 trln teńgesi TKSh salasyna. Ótken úsh jylda 1,020 trln teńge tartylyp, sonyń 684 mlrd teńgesi TKSh-ǵa tıesili boldy. Osy somanyń 98 paıyzy bıýdjetten tys qarjy kózderi esebinen qarjylandyryldy.

Osynyń arqasynda tabıǵı monopolııalar sýbektileriniń tozýy 66-dan 64,9 paıyzǵa deıin tómendedi.

Bul turǵyda S. Jumanǵarın shekti tarıfter boıynsha jumystar taǵy eki jyl jalǵasatynyn atap ótti.

Sonymen qatar, vıtse-mınıstr kommýnaldyq qyzmetter boıynsha tarıfter taıaý jáne alys sheteldegi elderderge qaraǵanda aıtarlyqtaı tómen ekenin sóz etti.

Búgin Senattaǵy talqylaýǵa qatysýshylar tabıǵı monopolııalar sýbektileriniń basqa da máselelerine, kórsetiletin qyzmetterdiń baǵasyn belgileý tártibine, ınvestıtsııalyq baǵdarlamalardy iske asyrý qadamdaryna ekpin qoıdy

Kezdesýdiń qorytyndysy boıynsha Komıtet qatysýshylardyń eskertýlerin eskere otyryp, tabıǵı monopolııalar sýbektilerin retteýdi jetildirýge, baǵa belgileýge jáne ınvestıtsııalyq mindettemelerdi memlekettik baqylaýǵa baǵyttalǵan usynystar ázirleıtin bolady.