Tirkeýsiz, qujatsyz azamattarǵa páterin jalǵa bergenderge aıyppuldy arttyrý kózdeledi - ІІM

ASTANA. QazAqparat - Tirkeýsiz, qujatsyz azamattarǵa páterin jalǵa bergenderge aıyppuldy arttyrý kózdeledi. Bul týraly búgin Parlament Májilisinde «Qazaqstan Respýblıkasynyń keıbir zańnamalyq aktilerine ekstremızm jáne terrorızm máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda QR Іshki ister mınıstriniń orynbasary Rashıd jaqypov málim etti.

«Kóshi-qon salasy boıynsha zań jobasymen tirkeýsiz nemese jeke basyn kýlándyratyn qujatsyz turǵandarǵa aıyppul sanktsııalaryn arttyrý usynylady. Sonymen bir mezgilde, tirkeýsiz turýǵa qatysty merzimdi bir aıǵa deıin qysqartý kózdelip otyr. Páter ıelerine olardyń páterlerinde tirkeýsiz tulǵalardy turǵyzylǵany úshin aıyppul sanktsııalaryn engizý boıynsha ákimshilik jaýapkershilik engiziledi. Mundaı normalar elimizdegi mıgratsııalyq rejımdi qamtamasyz etip, osy saladaǵy protsessti baqylaýǵa múmkindik beredi. Páter ıeleri men basqa da tulǵalardyń tirkeýsiz tulǵalardy turǵyzýǵa qatysty jaýapkershiligin arttyrady», deıdi R. Jaqypov.

Onyń aıtýynsha,  bundaı qadam páterlerdi jalǵa berý men olarǵa turǵyzýǵa qatysty bylyqty retteýge múmkindik beredi. «Úlken qalalarda keıbir páterlerde tipti eki-úsh júz adamǵa deıin tirkelgender bar. Sonymen qosa, qosymsha tirkeýsiz turyp jatqandar da jetkilikti», dep atap ótti ІІM ókili.