Tiri týǵan sábıdi óli dep hattama jasaǵan sheneýnik aıyppul tóledi

NUR-SULTAN. QazAqparat - Atyraý oblystyq patologoanatomııa bıýrosynyń burynǵy dırektory laýazymdyq ókilettigin asyra paıdalanǵany jáne qyzmet babynda jalǵan qujat jasaǵany úshin sottaldy. Bul týraly onlaın brıfıng barysynda QR Sybaılas jemqorlyqqa qarsy is-qımyl agenttiginiń 1-shi departamentiniń aǵa tergeýshisi Danııar Bıǵaıdarov aıtty, dep habarlaıdy QazAqparat tilshisi.

Onyń atap ótýinshe, Atyraý oblystyq sybaılas jemqorlyqqa qarsy qyzmeti «Atyraý oblystyq patologoanatomııalyq bıýrosy» memlekettik kásiporyn dırektorynyń mindetin atqarýshy I.Moldaǵalıevqa qatysty qylmystyq quqyq buzýshylyq boıynsha sotqa deıingi tergeýdi aıaqtady.

«Ol sot-medıtsınalyq saraptamanyń qorytyndysy boıynsha tiri týylǵan náresteni óli týǵan dep kórsetip, patologoanatomııalyq zertteýdiń hattamasyna kórineý jalǵan aqparat engizý arqyly laýazymdyq ókilettikterin asyra paıdalanǵan degen kúdik boldy», - dedi ol.

Aǵa tergeýshiniń dereginshe, osy jyldyń 28 naýryzynda Atyraý qalasynyń №2 sotynyń úkimimen I.Moldaǵalıevke 1 325 500 teńge kólemindegi aıyppul salyndy.

«Sottalýshy ómir boıyna memlekettik qyzmette laýazym atqarý quqyǵynan aıyryldy», - dedi Danııar Bıǵaıdarov.