Tımýr Jaqsylyqov valıýta baǵamyna qatysty pikir bildirdi

NUR-SULTAN. QazAqparat – Aldaǵy ýaqytta valıýta baǵamy tepe-teńdik sıpatyna deıin tómendeıtin bolady. Bul týraly Ulttyq ekonomıka birinshi vıtse-mınıstri Tımýr Jaqsylyqov málim etti, dep habarlaıdy QazAqparat tilshisi.

«Ulttyq bank qajetti sharany qabyldady, ony kórip otyrsyzdar. Búgin tańerteń aqparat taratylyp, saýda-sattyq qalaı júrgiziletini jarııalandy. Meniń oıymsha, bastapqy kezeńde qandaı da bir spekýlıatıvti reaktsııa bolsa da, keıinnen baǵam tepe-teńdik sıpatyna deıin tómendeıtin bolady», - dedi Tımýr Jaqsylyqov Májilisti tilshiler saýalyna jaýap bere otyryp

Budan buryn habarlanǵandaı , Ulttyq bank «Qazaqstan qor bırjasy» AQ-men birlesip teńge – AQSh dollary valıýta juby boıynsha saýda-sattyq reglamentin ózgertý týraly sheshim qabyldady. Atap aıtqanda, 28 aqpanda saýda-sattyq Nur-Sultan qalasynyń ýaqyty boıynsha saǵat 15-00-de Frankfýrt aýktsıony formatynda ashylady.

«Bul sharalar ýaqytsha sıpatqa ıe, belgisizdiktiń joǵary dárejesin jáne syrtqy geosaıası faktorlar tarapynan valıýta naryǵyna jáne el ishindegi qarjylyq turaqtylyqqa kórsetiletin qysymdy barynsha azaıtý qajettiligin kórsetedi», - delingen habarlamada.